Assi: Arnaq Nielsen/KNR

Naliliisartoq: Siulittaasutut taama tunuarneq eqqumiiginartoq

Atassutip siulittaasuata atuuffini qimaannarpagu partiimi ajortoqarsimassasoq, politikkikkut naliliisartoq, Ilisimatusarfimmilu tugasassiortunngorniat ilinniarfianni pisortaq, Naja Paulsen taama isumaqarpoq

- Taamatut tunuarneq eqqumiiginarpoq. Partiit siulittaasui immikkut ittumik ataatsimiititsinikkut naliginnaasumik tunuartarput. Kisianni Knud Kristiansenip tunuaannavilluni iluamillu nassuiaateqarusunnani tunuarnera eqqumiippoq, Knud Kristiansenip Atassummi siulittaasutut tunuarluni facebookkikkut nalunaaruteqarnera pillugu Naja Paulsen taama oqarpoq.

Knud Kristiansen Atassummit piffissami kingullermi tunuartuni kisimiinngilaq. Aamma Steen Lynge oktoberip naanerani siulittaasup tulliatut tunuarpoq.

- Siulittaasup siulittaasullu tullliata taama tunuarnerat ajornartorsiortoqarneranik takutitsisoq kialuunniit takusinnaavaa, Naja Paulsen oqarpoq.

AAMMA ATUARUK Knud Kristiansen Atassummit tunuartoq

Kinguaariit tullii

Atassummi kinguaariinnik nikittoqarnissaa maanna periarfissaasoq partiimi siulittaasup tullia Qulutannguaq Berthelsen isumaqarpoq. Taamaattoqassappallu partiimut iluaqutaassasoq, Naja Paulsen isumaqarpoq.

- Inuusuttut kinguaariit nutaat allanngortitsisinnaasut piukkunnarsartariaqartut isumaqarpunga. Taakkua pisoqaanerusut takutippaat, ukiuni kingullerni ingerlatsisinnaanerat killeqartoq, politikkikkut naliliisartoq, Ilisimatusarfimmilu tugasassiortunngorniat ilinniarfianni pisortaq, Naja Paulsen taama oqarpoq.

Politikkikkut ingerlatsineq pillugu naliliisartoq, Ilisimatusarfimmilu tugasassiortunngorniat ilinniarfianni pisortaq, Naja Paulsen taama oqarpoq.

Pingaarnertut suliarerusutanik aalajangiineq

Partiip pingaarnertut suliassaanik aalajangiineq Atassummut pingaarluinnartuusoq Atassut sinnerlugu Inatsisartunut Folketingimullu ilaasortaasimasoq, Ellen Christoffersen KNR-imut allappoq.

- Sinerissami immikkoortortaqarfiit ataatsimuulersinnissaat, politikkikkut suliniutissatut pingaarnersiuinissaq, tamatumalu kingorna nutaanik siulersuisoqalernissaq siulittaasutaarnissarlu Atassutip pisariaqartippaa, Ellen Christoffersen KNR-imut allappoq.

Partiimut tunuliaqutaasut siulittaasussamut, siulersuisuusussanut partiillu ilungersuutiginiagassaanut tapersiinissaat pingaartut, Ellen Christoffersen isumaqarpoq.

- Taava qinersisut Atassut sumi inissisimanersoq nalunavianngilaat, Ellen Christoffersen allappoq.

Isummersuutit

Inatsisartut Upernaakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat

...allarpassuillu!