Siulittaasunngorniuunneq naligiiffiusoq
Ippassaq KNR-imit oqaluttuaraarput Kim Kielsen Vittus Qujaukitsorlu siulittaasunngorniuunnermi naligiittorujussuusut, Kielsenimulli tapersiisut amerlanerulaarpasittut.
Inuit Kielsenimut qanittut siulittaasunngorniuunnissap qanilliartornerani toqqissisimanikuupput, unnualli ingerlanerani minnerusumik annerusumilluunniit nalornineq Kielsenip tapersersuisuini pilersimavoq.
Tassami Vittus Qujaukitsoq tapersersuisunilu unnuaq ulapissimapput, taasisussanik ujartuillutik sunniiniarlutik.
Tassa Kielseni tapersersorteqarpoq, Qujaukitsoq aamma tapersersorteqarpoq. Qeqqaniippullu aallartitat siulittaasutut qinigassaminnik suli aalajangiussisimanngitsut, ajugaaniaraannilu taakkua isumalluutaapput.
KNR-ip tusarfii naapertorlugit Qujaukitsoq qaammatialuit matuma siorna qularnanngitsumik ajugaasussatut inissisimasimasoq. Aleqa Hammondimilli Siumumut utertitsinissamik aammalu siulittaasunngussagunilu Inatsisartunik qinersititsinissamik Qujaukitsup oqariartuuteqarnerata kingorna tapersiisunik annaasaqarsimasoq oqaatigineqartarpoq.
Taamaammat pissanganassaaq takussallugu Vittus Qujaukitsoq Sisimiuni ataatsimeersuarnerup avataatigut aallartitanik ataatsimeeqateqartarnermini tapersersortinik utertitaqarsimassanersoq.
Taakku saniatigut oqaatigisariaqarpoq Kim Kielsen tapersersorteqarluarnera, aallartitat arlallik Kielsenip siulittaasutut sulineranik naammagisimaarinninnertik tusarliuttarpaat.
AAMMA ATUARUK Debat om dato for statsdannelse
