Partiinut tapiissutit: Siulittaasoqarfik Demokraatinit uukapaatitsiniarnerarneqartoq

Inatsisartut siulittaasoqarfiata partiinut tapiissutit 30 procentinik amerlineqarnissaannut siunnersuuteqarnermini paasissutissat pingaarutillit ilanngussimanngilai. Demokraatit taama oqarput. Siunnersuuteqarnermili akit najoqqutaralugit partiinut tapiissutinik aaqqiiniarlutik Inatsisartut siulittaasuata oqaatigaa.
Randi Vestergaard Evaldsen
Randi Vestergaard Evaldsen Assi © : Jonas Fievé/KNR
oktobarip 20-at 2017 16:08

Partiinut tapiissutit 2006-imiilli iluarsiissuteqarfigineqarsimanngimmata, tapiissutillu nalingi 30 procentinik 2006-imiilli milleriarsimammata, Inatsisartut siulittaasoqarfiata partiinut tapiissuteqartarneq pillugu inatsit allannguuteqartinniaraa KNR-imi oktobarip ulluisa aqqaneq aappaanni oqaluttuaraarput.

KNR-ip paasissutissat taakku siunnersuutip nassuiaatitaanit Inatsisartunullu saqqummiussissummit pissarsiarai.

Taakkunani ima allaqqavoq:

- Tapiissutit 2006-imiit iluarsiissuteqarfigineqarsimanngillat.

AAMMA ATUARUK Partiit imminnut tapiissutaasartut amerlinissaannut periarfissinneqartut

Partiinulli tapiissutit 2006-ioreerneraniilli marloriarlutik amerlineqarput, tamannalu Demokraatit siulittaasuata, Randi Vestergaard Evaldsenip, tusagassiuutinut nalunaarummi uparuarpaa.

- Siulittaasoqarfiup taamatut nassuiaatitalimmik allannera uukapaatitsiniarnerusoq isumaqarpunga. Isertuussaanngilaq partiinut tapiissutit 2009-mi aammalu 2010-mi toqqaannartumik qaffanneqartut, Randi Vestergaard Evaldsen allappoq.

Tapiissutit 116 procentinik 2009-mi amerlineqartut

Inatsit 2009-mi allanngortinneqarmat, partiinut tapiissutit 300.000 koruuninit 650.000 koruuninut amerlineqarput.

Tassalu partiinut tapiissutit 116 procentinik amerlipput. Tamatumunnga atatillugu partiit arlalinnik suliassaqalerput. Assersuutigalugu Inatsisartut allaffeqarfia partiinut siunnersortinik ukiuni arlalinni atorfinitsitsisarpoq, tamannalu tapiissuteqartarnermut  inatsimmik avaqqussineruvoq.

Inatsit 2009-mi allanngortinneqarmat, partiit qinigaatitaannut ataatsimut tapiissutit 36 procentinik amerlineqarput. Aamma 2010-mi qinikkanut ataatsimut tapiissutit 170.000 koruuninit 210.000 koruuninut amerlineqarput.

Partiinut tapiissutit akit najoqqutaralugit 2006-imiilli aaqqiisoqarsimannginnera siunnersuummi pineqartoq, Inatsisartut siulittaasuat Lars-Emil Johansen KNR-imut oqarpoq.

Partiinut tapiissutit 2009-mi marloriaatinngortinneqaraluartut tapiissutit nalingisa 30 procentinik milleriarsimanerannik allassalluni naleqquttuunersoq Lars-Emil Johansen aperineqarami, tapiissutit akit najoqqutaralugit aaqqiisoqarsimannginneranut Inatsisartut allattoqarfianit paasissutissat tunngavigineqartut oqarpoq.