KANGILINNGUIT Siulittaasoq: Kangilinnguani illuutit Namminersorlutik Oqartussat nammineerlutik akilertariaqassavaat
Illersornissaqarfiup suliffeqarfiit tallimat Kangilinnguani sakkutooqarfiusimasumi avatangiisinik saliinissamut illuutinillu isaterinissamut neqerooqqusimavai, Namminersorlutilli Oqartussat Illersornissaqarfiullu Kangilinnguit siunissami qanoq pineqassanersut suli isumaqatigiissutiginngilaat.
Illersornissaqarfiullu Kangilinnguani illuutit isaternagit pigiinnarnissaanik aalajangissangaluarpat tamanna Danmarkip Kalaallit Nunaatalu ataatsimoorullugu akilertariaqarpaat, illersornissamut ataatsimiititaliami siulittaasoq De Konservativeneersoq Rasmus Jarlov taama isumaqarpoq.
Suliap ataatsimiititaliami ippassaq eqqartorneqarnerata kingorna taama oqarpoq.
- Illuutit siunissami atorluarneqarsinnaappata isaternissaat sianiitsuliornerussaaq. Illuutilli pigiinnarnissaat, isateriarlugit sumiiffimmi saliinermit akisuneruleratarsinnaavoq. Taamaammat illuutit pigiinnarneqassappata, tamannalu Illersornissaqarfimmut aningaasartuuteqarnerunermik kinguneqassappat aningaasartuutaasinnaasut kalaallit naalakkersuisuinit akilerneqarnissaat tulluarsoraara, Rasmus Jarlov KNR-imut taama oqarpoq.
Aamma atuaruk KANGILINNGUIT Neqeroornissamut piffissaliussaq kinguartinneqartoq
Illersornissaqarfik qanorluunniit saliissaaq
Illersornissaqarfiup avatangiisinik mingutsitsisoqarsimaneranik saliinissaa Jarlowip aalajangiusimavaa. Naliliinerit malillugit annertuumik mingutsitsisoqarsimavoq - Illersornissaqarfiulli mingutsitsineq qanorpiaq annertussuseqarnersoq erseqqissumik nalilersinnaasimanngilaa.
Folketingimut ilaasortap Aleqa Hammondip (S) Kangilinnguani illuutit sumiiffiup ukiuni qulikkuutaani arlalinni atorneqarsimanerannut 'qujassutitut' Nunatsinnut aningaasartuutitaqanngitsumik danskit naalagaaffiannit tunniunneqarnissaat siunnersuutigisimavaa.
Jarlov naapertorlugu Kangilinnguit 'pitsaasuutillugu' utertinneqartussaavoq. Isumaqanngilarli Kangilinnguit sumiiffimmi suliniutinut nutaanut 'pilerinartunngortinneqarnissaa' Illersornissaqarfimmut suliassaasoq.
Illersornissamut ataatsimiititaliap illersornissamut ministeri Peter Christensen (V) suliaq pillugu isumasiorniarlugu aggersarnialerpaa.
Aammattaaq Namminersorlutik Oqartussat Illersornissaqarfiullu isumaqatigiinniarnerat ataatsimiititaliamit utaqqimaarneqartoq Jarlovip oqaatigaa.
- Aaqqiissutissamik nassaarniartoqassaaq. Kalaallit danskillu naalakkersuisuisa oqaloqatigiissutigalugu pitsaasumik aaqqiissuteqarnissaat aammalu aningaasartuutit tulluartumik agguataarnissaannik isiumaqatigiissuteqarnissaat naatsorsuutigaarput.
AAMMA ATUARUK Demokraatit: Kangilinnguit nunatta karsianut aningaasartuutaassanngilaq
Aamma atuaruk Suliariumannittussarsiuussineq ingerlatiinnarneqarniarpasippoq
Aamma atuaruk Suliariumannittussarsiuussinissamut Kalaallit Nunaat aalajangiissaaq
