Sisorarfik 600.000 koruuninik akiliisussanngortoq
Nuummi skiliftimut Sisorarfimmut aningaasaateqarfiup skiliftimi ingerlatsinermut aqutsisumik siorna soraarsitsisimanini pillugu 600.000 koruuninik akiligassinneqarpoq, Sermitsiaq.AG taama allaaserisaqarpoq.
Allattoq Kenneth Elkjær
marsip 17-at 2017 12:36
Soraarsitsineq pivoq ingerlatsinermut aqutsisuusimasoq filmiliortunut sulisunut sioorasaarerpalaartumik sakkortuuliorsimammat. Tamatumalu kingorna pineqartoq, 1991-imili sulisuusimasoq suliffimminit soraarsitaasimavoq.
Soraarsitsinermulli tunngaviit naammanngitsut, Nunatta Eqqartuussisuuneqarfiata nalilerpaa. Pineqartummi soraarsitaanera tunngavissaqanngitsutut nalilerneqarpoq. Taamaattumik Sisorarfiit ingerlatsinermut aqutsisuusimasumut 600.000 koruuninik akiligassinneqarpoq. Sermitsiaq.AG. allaaserisaqarpoq.
Tamatuma saniatigut suliap ingerlanneqarneranut aningaasartuutit Sisorarfiup akilissavai.
Sisorarfiulli suliaq ingerlateqqitassanngortipaa.
