Sisimiut illorsuassaat ilimagisamit akisunerussaaq
Sisimiut kulturikkut illorsuassaat qanittukkut suliariumannittussarsiuunneqarmat, paasinarsivoq siunnerfigisamit akisunerussasoq. Siunnerfigisaq 20 million koruuniusimagaluarpoq, maannakkulli illorsuassaq minnerpaamik 31 million koruuninik akeqassangatinneqarpoq.
Sisimiut kommunalbestyrelsianni ilaasortaq, teknikkeqarnermullu ataatsimiititaliami siulittaasoq, Kristian Lennert oqarpoq, aningaasaqarnermut ataatsimiititaliamut 20 million koruunit qaavatigut 11,2 million koruuninik qinnuteqaateqarniarlutik. Akitsorsaataasunullu ilaavoq illorsuaq eqaannerusumik atorneqarsinnaasariaqarmat:
- Illorsuup eqaatsumik atorluarneqarsinnaaneranut init assigiinngitsut ataatsimuulersinneqarsinnaasariaqarput, inersuarlu inerujussuanngortinneqarsinnaasariaqarluni, Sisimiut Kommuneanni teknikkeqarnermut avatangiisinullu ataatsimiititaliami siulittaasoq Kristian Lennert oqarpoq.
Borgmesteri Hermann Berthelsenip Sisimiut Kommuneata maanna iliussissai ima nassuiarpai:
- Kommunimi aqutsineq malillugu aningaasaqarnermut ataatsimiititaliap tamanna suliarisussanngussavaa, ataatsimiititaliallu ingerlariaqqinnissaq aalajangiissavaa, isumaqatigiissutigineqarpallu kommunalbestyrelsip kingusinnerusukkut aalajangiiffigissavaa.
Aningaasaqarnermut ataatsimiititaliaq marlunngorpat marsip 15-ianni ataatsimiissaaq, tassanilu kulturikkut illorsuassaq oqaluuserineqassaaq.
Kulturikkut illorsuassaq kommunalbestyrelsip akuersineratigut maajip qeqqata missaani sananeqalersinnaassaaq. Sananeqalersinnaassappallu illorsuaq aappaagu ukiarpat naammassineqarsinnaassaaq.
