Sisimiuni meeqqat asseqanngitsumik naluttarfittaarusupput
Naluffissaq 25 miiterinik takissuseqassaaq, sanileriinnik arfinilinnik naluffissaqarluni, meeqqanut sisoortarfeqassaaq, naalungiarsunnut immikkoortortaqarluni, saunaqarluni timigissartarfeqarlunilu.
Qaqqap iluani naluttarfik Norge-mi piviusunngortinneqareerpoq, kommunimilu ilaasortat arlallit takuniarsimavaat alutoralugulu, Sisimiut aviisianni Sillermi tamanna allaaserineqarpoq.
Naluttarfik qaqqap iluani sanaaq aserfallatsaalisariaqarpallaanngilaq, oqoqalersinnaanani, kiassarnermullu 50 procent tikillugu ileqqaarneqarsinnaalluni.
Teknikimut ataatsimiititaliami siulittaasup, Hans Frederik Olsenip, Norge-liannginnermini qaqqap iluani naluttarfiliornissaq qularisimagaluarpaa.
- Norgemukarnermali qularunnaarsippaanga, neriuutigiinnarparalu pilersaarutip piviusunngortinnissaa, Sillermut oqarpoq.
Kommunip maanna neriuutigiinnarpaa Villumip aningaasaateqarfiata pilersaarummut akuersinissaa, pilersaarutinimmi allanik toqqagassaqarpoq, aningaasanik ukioq-manna kingusinnerusukkut agguaasseqqileruni.
