Sisimiuni eqqakkanik immikkoortiterineq aallunneqalersoq
Sisimiuni innuttaasut tamarmik angerlarsimaffimminnit eqqagassanik arrorsinnaasunik immikkoortiterisalernissaat pitinnagu, misileraanermi ilisimasanik katersisoqarnissaa Qeqqata Kommunianit aamma Namminersorlutik Oqartussanit kissaatigineqarpoq. Tassani eqqakkanik arrorsinnaasunik, soorlu nerisat sinnikuinik aatitsisinnaanermut periarfissat misilerarneqassapput.
- Namminersorlutik Oqartussat kommunillu ataatsimoorlutik eqqagassalerinermi aaqqiissutissanik eqqortunik nassaarniassapput. Taamaattumik misileraanernut, kommunit aaqqiissutissanik pilertornerusumik nassaarnissaannut iluaqutaasussanut, avatangiisitsinnut eqqagassalerinermullu pitsannguisussanut, aammalu najukkani pissutsinut naleqquttunut tapiisarpugut, Avatangiisinut Pinngortitamullu Naalakkersuisoq Kim Kielsen taama oqarpoq.
Misileraalluni suliniuteqarnikkut misilittakkanik tigussaassunik katersisoqassaaq
Naalakkersuisut suliassanut ukioq manna aallartinneqareersussanut 759.000 koruuninik aningaasaliissuteqarput. Misileraaneq katersueriaatsinik, tassalu puussat suut eqqakkanik immikkoortiterinermut naleqqunnerpaanersut, eqqakkat qanoq immikkoortiterneqartarnersut akulerunneqartassanersullu, aammalu eqqakkanik aatitsinerpiaap qanoq ingerlanneqarnissaanut paasiniaanermi atorneqarsinnaasunik misilittagaqalernissamut atorneqassaaq. Sisimiuni najugaqarfiit suut aammalu inoqutigiit qanoq amerlatigisut peqataatinneqassanersut suli aalajangerneqanngilaq.
AAMMA ATUARUK Ulorianartunik eqqagassalerineq illoqarfinni tamani aqunneqarsinnaalissaaq
Qeqqata Kommunia nammineerluni atortunut, eqqakkanik agguluisussanut 538.000 koruuninik aningaasaliissuteqassaaq, aammalu nalunaaquttap akunneri suliamut atorneqartut tamaasa akilissallugit. Misileraaneq ukiuni marlunni ingerlanneqassaaq, tamatumalu kingorna iluaqutissartaasut ajoqutissartaasullu nalilersorneqassapput kommuninullu allanut ingerlateqqinneqassallutik.
Qaasuitsup Kommuniani allamik suliniuteqartoqassaaq
Aamma Qaasuitsup Kommuniani suliap ataatsip ingerlaqqinnissaanut 300.000 koruuninik Naalakkersuisut neriorsuuteqarput. Suliaq taanna eqqakkanik ikuallanneqarsinnaasunik Qeqertarsuarmiit Aasianni ikuallaavimmut assartuinissamut tunngasuuvoq. Aningaasat atortut, eqqakkanik ikuallanneqarsinnaasunik immikkoortiterinermi atorneqartut pitsanngortinneqarnissaannut, taamaalillunilu suliap aallartilluarsinnaalernissaanut atorneqassapput.
Qaasuitsup Kommuniani suliaq iluatsilluassappat, tamanna illoqarfinni mikisuni nunaqarfinnilu najukkani eqqagassanut inissiivinnik imaluunniit ikuallaavinnik pilersitsisariaqarfiusussaagaluartuni eqqagassalerinerup pitsaasuunissaanut pingaaruteqartorujussuusinnaavoq.
