Sisimiuni aalisartut isornartorsiunerat Royal Greenlandimit paasineqanngilaq
Umiarsuarmik tunitsiviusinnaasumik akuersissuteqartoqarnissaa, Sisimiuni saarullinniat marlunngormat ujartorpaat. Piumasaqaallu taanna Aalisarnermut Naalakkersuisup Karl-Kristian Krusep Aalisarnermut Siunnersuisoqatigiinnut saqqummiussimavaa.
Aalisartulli isornartorsiuinerat Royal Greenlandimit paasiuminaatsinneqarpoq, Naalakkersuisullu umiarsuarmik tunitsiviusussamik akuersissuteqannginnissaat kajumissaarutigalugu.
Aamma atuaruk Kruse Sisimiuni saarullilerineq pillugu sulipallattoq
Sisimiuni aalisartut tulaassuisinnaanissaannut periarfissanik pitsanngorsaalluni ukiuni kingullerni pingasuni suliniuteqarluarsimaneranik taallugu Royal Greenland tusagassiuutinut nalunaarummik nassiussaqarpoq, tulaassuisoqanngilluinnarneraniit ullumikkumut 40 tonsit ulloq unnuarlu tulaassuisoqarsinnaalersimanera ilaatigut oqaatigalugu, tassa Sisimiuni, Itillimi Sarfannguamilu ullumikkut tulaassuisoqartalernikuummat.
Umiarsuarmillu tunitsiviusinnaasumik periarfissiisoqaraluarmat aalisartut ikittuinnaat periarfissaq tamanna atorsimavaat, Royal Greenland oqarpoq.
Angallat uumatitsivik Maniitsumit Sisimiunut ukioq manna illuartinniarlugu Royal Greenland taamaammat aalajangerpoq, aalisartut taamaasillutik saarullinnik uumasunik tulaassuisinnaaniassammata.
Saarulliit suli uumatillugit tunisassiorfimmut ingerlatinneqartarput, nerpiiaavimmi nutaami 40-nillu sulisulimmi tunisassiarineqarsinnaanissaat periarfissaalersimalluni.
Aamma atuaruk Sisimiuni aalisartut umiarsualivimmik assersuinissamut piareeqqapput
Aalisartut tallimat tulaassuisussatut Royal Greenlandip siusinnerusukkut isumaqatigiissusiorfigai, Royal Greenlandilli ilisimatitsissutigaa marluinnaat isumaqatigiissummik eqquutsitsisimasut.
Sisimiut eqqaanni aalisarneq ukioq manna pitsaalluinnartoq nalunaarutigineqarpoq, angallammillu uumatsivimmik periarfissiisoqarneratigut Maniitsumi nerpiiaaviup tunisassiorsinnaanissaa atorluarneqarsinnaasoq Royal Greenlandip oqaatigaa.
Saarullinnik tunisassiorneq nutaaq tamanna politikerit annertunerusumik Nunatsinni tunisassiatigut ineriartortitserusunnerannut suliffissaqartitserusunnerannullu naapertuuttoq Royal Greenland isumaqarpoq.
