SIS: Qinersisinnaatitaasut ukiuisa killingat appartinneqassanngilaq
Qinersisinnaatitaasut ukiuisa killingata 18-init 16-inut allanngortinneqarnissaanik Inuit Ataqatigiit siunnersuutaat Siumup Inuusuttaasa Suleqatigiiffiata, SIS-ip, sakkortuumik qisuariarfigaa.
Inuit Ataqatigiit Inatsisartuni ilaasortaatitaata siunnersuutaat Inatsisartut ukiakkut ataatsimiinneranni tallimanngorpat septembarip 25-ani aallartittusami oqaluuserineqartussaavoq.
Inuit Ataqatigiit taamatut siunnersuuteqarnerminni tunngavilersuutigaat qinersisinnaatitaasut ukiuisa killingata appartinneratigut Nunatsinni inuusuttut tamat oqartussaaqataaneranni toqqaannartumik peqataanissaat qulakkeerneqassasoq.
Partiimit aamma oqaatigineqarpoq inuusuttut 16-it 18-illu akornanni ukiullit 18-it sinnerlugit ukiulittulli inersimasutut arlalitsigut atugassaqartitaareersut. Assersuutigalugu Pinerluttulerinermi inatsit tunngavigalugu inersimasutuulli pineqaatissinneqarsinnaallutik.
AAMMA ATUARUK Oqaluuserisassat 111-t
Inuusuttut 18-it inorlugit ukiullit meeqqatut isigineqarput
Siumulli inuusuttaasa siunnersuut isumaqatiginngilaat Naalagaaffiit Peqatigiillu meeqqat pisinnaatitaaffii pillugit isumaqatigiissutaannut naapertuutinngitsutut isigalugu, tassanimi inuusuttut 18-it inorlugit ukiullit meeqqatut isigineqarmata.
- 16-inik ukiullit Naalagaaffiit Peqatigiit meeqqat pillugit isumaqatigiissutaani suli meeqqatut isigineqartut qinersisinnaatitaalissappata/qineqqusaartalissappata inooqataanermi pisunut ukiunut naleqqutinngitsumik peqataatinneqalissagamik, SIS tusagassiorfinnut nalunaaruteqarluni taama allappoq.
Meeqqalli inuusuttullu peqatigiiffitsigut kattuffitsigullu sunniuteqaqataasinnaapput. Meeqqallu inuusuttullu inuiaqatigiinnik ilusilersueqataanerannut partiit inuusuttunut suliniaqatigiiffii assersuutissaalluartut Siumup Inuusuttai isumaqarput.
