Sipaarniarnermi aningaasat aallerfigineqartussat nassaarineqareerput
Sipaarniarnermi aningaasat aallerfiusussat nanineqareerput, partiiniillu allanit ilalersorneqarlutillu tapersersorneqarput.
Naalakkersuisoqarfinni amigaataaginnalersoq tassaavoq Peqqinnissamut Isumaginnittoqarfik.
Sinerissami illoqarfinni pingasuni nakorsat ataavartut peerneqarnissaanik siunnersuut siulleq tunuartiinnarneqarpoq, tassungalu taarsiullugu sumi sipaarniartoqassanersoq naluneqarallarluni aningaasaqarnermut naalakkersuisoq oqarpoq.
Sipaaruteqarnissamut pilersaarutit tapersorneqarput
Aningaasaqarnermut inatsisissap pingasunngormat aappassaaneerneqarnerani Naalakkersuisup sipaarniarfissani siunnersuutaani illuatungiliuttunittaaq tamanna isumaqatigineqarpoq taperserneqarlunilu, Peqqissutsimulli naalakkersuisup, Martha Lund Olsenip siunnersuutaannut illuatungaanik pisoqarpoq.
- Peqqinnissamut Isumaginnittoqarfimmi sipaarniarnissamut isumaqataanngilagut. Kigutileriffiit sipaarniarfigineqarneri ernummatigisorujussuuagut.
Naaja Nathanielsen IA-meersoq taama oqarpoq, allallu siunnersuutaannut isumaqataanertik ilanngullugu oqaatigaa.
- Naalakkersuisuninngaanniit sipaarutissatut siunnersuutigineqartut ilaat isumaqataaffigaavut, tungitsinniillu apeqqusikkavut qaqippavut Naaja Nathanielsen taama oqarpoq.
Aningaasaqarnermut Naalakkersuisoq utaqqimaarpoq
Aningaasaqarnermut naalakkersuisoq Andreas Uldum, sumi sipaarniartoqarsinnaaneranik siunnersuuteqarusunngilaq, Peqqissutsimut naalakkersuisup nammineerluni aningaasat suminngaanniit aaneqassanersut ujartornissaanut Andreas Uldumip tatigilluinnarlugu oqaatigaa, Martha Lund Olsenimullu innersuussiinnarluni.
Siunnersuutigineqartut ataasiakkaat aningaasaqarnermut ataatsimiititaliap naalakkersuisullu oqaloqatigiissutigiumaarpaat.
Peqqissutsimut naalakkersuisoqarfik qaqugu nutaamik siunnersuutissamik nassaarumaarnersoq suli naluneqarpoq, Andreas Uldumillu suliaq ingerlanerarpaa.
Martha Lund Olsen KNR-imiit oqaaseqartinniaraluaratsigu iluatsinngikkallarparput, Naalakkersuisoqarfiilli neriorsuipput ullumikkut marlunngornermi uterfiginninniarlutik.
Aningaasanut inatsisip inatsisartuni pingajussaanerlugu oqaluuserineqassaaq maajip ulluisa aqqaneq aappaanni