Siorasaarisutut pasisaq ulluni 25-ni tigummigallagaassaaq
Angut GU-mut siorasaarisimasutut pasineqartoq ippassaq arfininngornermi ualikkut tallimanut qeqqaliivissoq tigusarineqartoq, sapaatiummat inatsisit tunngaviusut naapertorlugit, eqqartuussivimmi najuutsinnagu sassartinneqarpoq. Angut pinngitsaalisaalluni massakkut unitsinneqarsimavoq, taamaatumik eqqartuussivimmi najuussinnaanani.
Politiini unnerluussissutissaatitaasup, vicepolitimesterip Morten Nielsenip Nuummi eqqartuussivimmi suliaq ingerlappa.
- Pasisaq aallaasersersornissaminik ilaatigut piareersaateqarsimavoq, timmiarsiut kipisamik pigisaqarluni, toqutsinissamillu allakkatigut GU-mi atorfilimmut siorasaarisimalluni, taamaammat toqutseriaraluarsimasutut aamma pasivarput, vicepolitimester, Morten Nielsen KNR-mut oqarpoq.
Eqqartuussinermi pasilliut unnerluussissutissaatitaasumik atuarneqarpoq. Nalunaarutigineqartorlu atuarfimmi Columbinemi allagaq assigusoq issuarneqarpoq, "who's next - may your next", kalaallisut: "kina tulliussava, illit tulliussavit" allagaq naggaserneqarsimalluni.
Morten Nielsenip aallaat pasineqartup inaani tigusarineqarneranut atatillugu nanineqarsimasoq saqqummiuppaa. Aallaat eqqumigut paavatigullu naalillugu kipineqarsimavoq.
Unnerluussissussaatitaasut tigusarineqartup ulluni 25-ini marsip pingajuata tungaanut tigummineqarallarnissaa piumasaraat. Tassani paasiniaaneq tigusarineqartullu pinerloqqeratarsinnaanera aarleqqutigineqarmat.
Illersuisuata, Ulrik Blidorfip piumasarineqartut akerlilinngilai, atermilli taasisoqannginnissaa piumasaralugu. Eqqartuussisullu Johanne Banke Thorupip tamanna akueraa. Tamanna isumaqarpoq, tigusarineqartup aqqa, atorfia najugaqarfialu taaneqassanngitsut.
Eqqartuussivimmi suliap inerneraa, pasineqartoq sassartinneqarnissaminut najuussinnaannginnera, taassuma napparsimavallaarnera peqqutaalluni napparsimavimmi uninngatinneqarallarmat.
Tassa tigusarineqartup ulluni 25-ini marsip pingajuata tungaanut tigummineqarallarnissaa inerniliunneqarallarpoq. Neriuutigineqarporlu ulluni 25-ini peqqissinerunissaa, sassartinneqarnissaanut naammakkumaartut, vicepolitimester, Morten Nielsen KNR-imut oqarpoq.
