Sinneqartoorutit Sermersuumi nuannaarutigineqarput

- 2014-i aningaasatigut ilungersunartorsiorfiusoq kikkut tamarmik eqqaamassajunnarsivaat. Aningaasaqarnermut naalakkersuisoqarfimminngaanniit annertusisamik nakkutigineqalertussanngornitta pillugu marsip qaammataani  allagarsigatta aamma eqqaamaneqassaaq. Killiffik ilungersunarpoq, annertuunillu sukaterinertalimmik aalajangersaavugut, Kommuneqarfik Sermersuumi borgmmesteri Asii Chemnitz Narup taama oqarpoq.

Kommunip Aningaasaqarnermut Naalakkersuisoqarfimmit ukioq kingulleq sukannersumik nakkutigineqalernerata kingorna kommunimit aningaasaqarnikkut ingerlatsineq pitsanngorsarniarlugu pilersaarusiorsimapput.

Aamma atuaruk Inunnik isumaginninnermik suliallit sipaarniarnermi eqqugaassanngillat

Kommunimi isumaginnittoqarfinni tamani sipaarfigineqarsinnaasunik ujarlersimapput, kommunip iluani 10 000 koruunit qaangerlugit pisisoqarniarnermi pisortaninngaanniit akuersissutigineqaqqaartariaqarnissamik maleruagassaliorsimallutik, atorfiillu 75-it atorunnaarsinneqarnissaannut ilaatigut pilersaaruteqaraluarput.

Atorfiilli 47-t atorunnaarsinneqarput.

Sukaterinernik aalajangiinissat ilai sapernarsimagaluartut pisariaqarsimapput, borgmesteri isumaqarpoq.

Sinneqartoorutissalli 3 millionit koruuniunissaannut naatsorsorneqaraluarput.

Taamaakkaluartoq kommuni sipaarniarpallaarsimanngitsoq borgmesteri isumaqarpoq.

- Taamatut oqarusunngilanga. Nakkutigineqaleratta missingissuusiornerput soorunami misissoqqittariaqalersimavarput, aammalu akueralugu nassuerutigalugulu aningaasaqarnikkut aqutsinitta pitsaanerulissappat sipaarutissanik ujaarlertariaqarluta, Asii Chemnitz Narup oqarpoq.

Aamma atuaruk Sermersooq iluamik aallarpoq

Tulluartoq

Kommunimiillu naatsorsuutigisaminninngaanniit sinneqartooruteqarnerusimanerat nuannaarutissaasoq, kommunillu aningaasaqarnikkut politikkianut tulluartuusoq, Asii Chemnitz Narup isumaqarpoq.

- Ukiuni tulliuttuni tallimani 25 millionit koruuninik ukiumut sinneqartoortarnissarput, aningaasaqarnermut politikkitsinnut siunniussaraarput. Taannalu matumuuna naammassineqarmat aamma qujanarpoq pissutigalugu ukiumiit ukiumut taamaallaat eqqarsartussaanngilagut, Asii Chemnitz Narup oqarpoq.

Kommuneqarfik Sermersuup 2014-imut ukiumoortumik naatsorsuutai kommunalbestyrelsip apriilip 28-ani ataatsimiinnerminni kukkunersiuisumut nassiuppai.

Kommunalbestyrelsip ukiumoortumik naatsorsuutit ataatsimoorlutik nuannaarutigalugu nalunaarutigaat.