AWG2016 Siniffiit quleriit 900-t tuniniarneqarput
Nammineq kajumissutsiminnik sulisut, atuarfinni tallimaasuni, issittumi timersualaarnermi peqataasut najugaqarfigisaanni ullumi aqagulu torersaarsuaassapput.
Timersornerup aallartinnginnerani, atuartut nerrivii issiaviilu pisataallu atuarfigisaanniit annissuunneqarput, aaqqissuisullu pisiaannik, siniffinninik 900-nik, madrassinik sinngu-puunillu taarserneqarlutik.
- Ullup qeqqanut ullumi aallartippugut. Siniffiillu amerlanersaat isaterneqareerput, madrasset sinngu-puullu katersorneqarput. Atuarfiit piareersarlugit suliarput aqagu nangeqqissavarput, Kingorna eqqiiaasartut ISS-imeersut takkutissapput eqqiaallutillu, atuarfiit atuartut sisamanngorpat atualeqqinnissaannut piareersarlugit, Arnakkuluk Jo Kleist oqarpoq.
Siniffippassuit madrassellu maanna tuniniarneqartussanngorput.
- Kommunet savaateqarfiillu Mamminersorlutik oqartussat, efterskolellu tamakku ilaat pisiarereerpaat.
Sinneruttut 500-t aqagu sapaammi tuniniarneqalissapput, tassa kikkulluunniit takkullutik siniffinnik, madrassenik akikitsunnguanik pisisinnaapput, Arnakkuluk Jo Kleist KNR-mut oqarpoq.
Tuniniaaneq ASK-mi, Atuarfik Samuel Kleinschmidtimi Nuummi aqqanermut aallartissaaq.
Siniffik quleriik qanoqassua ?
- Siniffik quleriik madrasselerlugu 150 koruuneqassaaq. Isumaqarpugut siniffittaarusukkaanni, allanulluunniit siunertqartumik atorusukkaanni, tamanna akigitaq pitsaasuusoq. Malugisinnaavarput soqutigineqartorujussuusut, assullu qassit aqagu pisiumaarnersut pissanngatigaarput.