Sillimmasiisut amerliartorput

Najugaqarfimmi pigisat ikuallattoornissaannut tillinneqarnissaannulluunniit sillimmaserneqartarnerat Kalaallit Nunaanni illoqarfinni annerni atugaaneruleriartuinnaraluaq isorliunerusuni najugallit suli atugaringaanngilaat.

Sillimmasiisarfimmi saaffigineqartartoq Dora Drechsel oqarpoq ukiuni kingullerni illoqarfinni annerni najugaqartut pigisatik eqqarsaatigalugit sillimmasertartut amerliartuinnartut isorliunerusunili najugaqartut tamanna suli atugarivallaanngikkaat.

Sillimmasertannginneq isorliunerusullu eqqarsaatigalugit qangalili inuit ikioqatigiinnerugallarmatali aarlerinanngitsumik inuuneqarallarmeersutut igunarpoq aammalu aningaasat atugassat tulleriiaarneqarnerannik ilaqarunarluni, tassa atorfissaqartinnerusunut aningaasaatinik atuinissamik pissuteqarunarluni, taamalu sillimmasiinissaq pingaarnerpaanut ilaasutut isigineqarani.

Tassunga atatillugu Dora Drechsel oqarpoq sillimmasiisarfimmit paasisitsiniaanerunissaq pisariaqarsinnaasoq. Ataatsimulli isigalugu Kalaallit Nunaanni najugaqartut amerlassusiannut naleqqiullugu imminut sillimmasertarnerup qanoq annertutiginera annikitsigineraluunniit kisitsinngorlugu oqaatigiuminaatsoq Dora Drechsel oqarpoq.