Sillimaniarneq ammaffigineqarnerulissaaq
Suliassaqarfimmi politikkikkut akisussaasoq Ove Karl Berthelsen taama ilisimatitsivoq.
- Suliavut ullut 14-it ingerlaneranni aallartinneqassapput. Ilimanarporlu tamanna tamanut ammaassinermik kinguneqassasoq, Aatsitassanut Naalakkersuisoq KNR-imut oqarpoq.
Suliniartoqalerneratigut sillimaniarnermut pilersaarutinik inuiaqatigiinnut saqquammanerulernermik kinguneqassasoq, Naalakkersuisut siulittaasuata uppernarsarpaa.
- Suut tamarmik saqqummiunneqartalissasut qularnaarsinnaanngilara, pissuteqavilluta mianersoratta. Taamaattumik aammaassinissatta sillimaniarnermut ulorianartorsiortitsinnginnissaa qulakkeeqqavarput, Kuupik Kleist oqarpoq.
Nunatta politikkikkut aqutsisuata oqaatigaa Naalakkersuisut sillimaniarnermut pilersaarutinik isertuussinerannik isornartorsiuinerit aaqqinniarlugillusooq suliniut aallartisarneqartoq. Taassumalu saniatigut tamat oqartussaaqataanerata uuliasiornerup iluani atorneqarnerulernissaa,Namminersorlutik Oqartussanit siunertaajuarsimasoq Kuupik Kleist oqarpoq.
Aatsitassanut Naalakkersuisoq Ove Karl Berthelsen Aatsitassanullu Naalakkersuisoqarfiup pilersaarutinik isertuussinertik Greenpeacekkut atortunik aserorterinissaannut qillerinernillu unitsitseratarsinnaanerannut ernumassuteqarnermik tunngaveqarnerartarpaat. Danmarkimili pilersaarutit tamarmik saqqummiunneqartarput ajutoortoqarnerani oqarasuaatit sianerfissat minillugit, maannamullu nunatsinni taamaaliortoqarnissaa suli itigartitsissutigineqartarpoq.
Suliniut qaammatini pingasuni kingullerni ingerlanneqareersimasoq, Ove Karl Berthelsenip oqaatigaa. Kuupik Kleistillu siunniuppaa, sunarpiaq saqqummerneqassanersoq, aggustip 15-ianni Naalakkersuisut saqqummiutissagaat.
Greenpeacekkut sillimaniarnermut tunngasunik allagaatinik takunninnissamut qinnuteqaataat, itigartitsissutigineqarneranut ombudsmandimut maalaarutaa maannakkut suliarineqaleruttorpoq.
