Silarsuarmi nunat silap pissusia pillugu ataatsimeersuarnermi isumaqatigiissuteqartut

Silarsuarmi nunat silap pissusia pillugu Bonnimi ataatsimeersuarnerminni ikummatissanit aniatitsinermut akiuiniarnerup 2018-imi naliliiffiginissaa isumaqatigiissutigaat. Franskit nutaarsiassaqartitsiviat AFP taama allaaserisaqarpoq.

Aniatitsinermut killiliussatut silap pissusia pillugu Parisimi 2015-imi isumaqatigiissutigineqartup eqquutsinnissaanut qanoq iliuuseqarnerusoqartariaqarnersoq pillugu misissuinissaq nunat pilersaarutigineqartumit akunnernik aqqaneq-marlunnik kingusinaarlutik akuersissutigaat. 

Aamma Polenimi Katowicemi aappaagu ataatsimiinnissamut suleriaasissaq, Tanaloa-dialogimik Fijimi COP-ip siulittaasuanit taaguuserneqartoq, nunat isumaqatigiissutigaat. Taanna ammasumik peqataatitsisumillu oqaloqatigiinnermik qulakkeerinnissaaq.

USA kamatsitsisoq

USA silap pissusia pillugu ataatsimeersuarnermi peqataanngilaq, naak USA-p præsidentiata, Donald Trumpip nunani isumaqatigiissummit anisinniarlugu nalunaarutigereeraluaraa.

USA-p aningaasaqarnermut Bonnimi isumaqatiginninniarnerni uteriarumannginnera aallartitat ilaasa kamaatigigaat AFP-p allaaseraa.

Aamma USA-p atorfilittai nukissiuutinik ingerlatseqatigiiffiit arlallit qullersaat peqatigalugit ikummatissanik atuinermik illersuillutik sammisaqartitsimmata, pissutsit najummassimanartorsiorfiunerulerput.

Akerleriittoqaraluartorli COP 23-mi isumaqatiginninniarnerit nunarsuarmi silap kissakkiartornerata 1,5 gradit 2 gradillu akornanniitinnissaanut anguniakkap piviusunngortinnissaanut qanilliallatsitsipput.

                             /ritzau/