Silap pissusiata allanngoriartornera pillugu Det Hvide Husip nittartagaani allaaserisat Trumpip peerpai
USA-p nutaamik præsidentertaarneratigut assersuutigalugu præsidentip Washingtonimi illorsuani Det Hvide Husimi allanngortiterisoqaannanngilaq. Præsidentilli pisortatigoortumik nittartagaa aamma allanngortiteriffigineqalereerpoq.
Donald Trumpip præsidentiunermini anguniakkami pingaarnersaasa ilaat nammineq allaaserai.
Nukissiuuteqarneq pillugu suliniutit arfinillit taakkununnga ilaapput. Siuliata Barack Obamap Climate Change Action Planimik taallugu suliniutaata unitsinneqarnissaa taakkununnga ilaavoq. Silap pisussiata allanngoriartornerata akiorniarneqarnissaanut Obamap suliniutaa Trumpip unitsippaa. CO2-mik aniatitsinerup USA-mi annikillisarneqarnissaa, orpippassuit eriagisassatut pineqartussat nukissiuutinillu ataavartunik atuinerunissamut pilersaarutit Donald Trumpimit unitsinneqarput.
Silap pissusiata allanngoriartornera allaaserineqanngilaq
Uuliasiortoqarnerullunilu gassimik qalluisoqarnerulernissaa Trumpip akerlianik siunniuppaa.
- Skifer-uuliamik gassimillu qalluineq Trumpip pingaartuutinniarpai, amerikamiullu millionilikkaat suliffissaqarlutillu atugarissaarnerulernissaat taamaalinikkut qulakkeerneqarsinnaassaaq, Det Hvide Husip nittartagaani taama ilaatigut allassimavoq.
Silap pissusiata allanngoriartornera pillugu paasissutissanik præsidentip illorsuata nittartagaata iluani ujarleraanni maanna nassaassaqanngilaq, naak siornatigut taamaaliortoqarsinnaagaluartoq.
/ritzau/