Kielsen: Silap pissusia sallernut ilaatipparput
Novembarip 17-iani 2017 nutarterneqarpoq: Aqqaluk Lynge ICC-mi siornatigut præsidentiusimavoq. Naalagaaffiilli Peqatigiit Silap pissusia pillugu Bonnimi ataatsimeersuartitsinerannut nammineerluni peqataavoq ICC-lu sinnerlugu oqaaseqarani.
Naalakkersuisunut ilaasortanik Namminersorlutillu Oqartussaneersunik FN-ip silap pissusia pillugu Bonnimi Tysklandimiittumi maanna ataatsimeersuarneranut peqataatitsinissamit pingaarnerusunik isumagisassaqarpoq. Naalakkersuisut siulittaasuat, Kim Kielsen, taama isumaqarpoq.
Taassuma ICC-imi siulersuisuni ilaasortap Aqqaluk Lyngep Naalakkersuisut ataatsimeersuarnermut ataasiinnarmilluunniit peqataatitsinnginnerannut isornartorsiuinera taama akivaa.
Aqqaluk Lynge taama isornartorsiuivoq, naak ataatsimeersuarnerup Parisimi isumaqatigiissummi, Nunatta peqataaffiginngisaani, immikkuualuttut inissittornissaat siunertarigaluaraa.
AAMMA ATUARUK Nunatta ataatsimeersuarnermi ilaannginnera isornarpoq
Inatsisartulli ukiaanerani ataatsimiinnertik, ilaatigut 2018-imi aningaasanut inatsisissaq, isumalluutinik atuinermi akitsuutit aalisarnermilli iluarsaaqqinnissaq isumaqatigiinniutigalugit, naammassinialeruttorpaat.
- Massakkut suliat Inatsisartuni qaleriiaartupilussuullutik aamma aningaasaqarnermut inatsisissaq suliarineqaleruttornerata nalaani pisut taakkua eqqarsaatigalugit peqqutaavoq aamma Naalakkersuisut tappavunga aallartitsinngitsut, Kim Kielsen KNR-imut oqarpoq.
Kielsen: Silap pissusia oqaluuserisatsinni sallernut ilaavoq
Naalakkersuisulli siulittaasuata erseqqissarpaa, imaanngimmat Naalakkersuisut silamut tunngasumik suliaqanngitsut.
Oqarpoq, Nunarput Parisimi isumaqatigiissummut 2015-imeersumut peqataanissamut naaggaarsimagaluarlutik, assigiinngitsunik anguniagaqarlutik, nunatsinni ilungersuutigisaminnik.
Siumut, Inuit Ataqatigiit Partii Nalerarlu naalakkersuisoqatigiinnissamut isumaqatigiissumminni ilaatigut neriorsuipput, "ersarissumik silaannaap allanngoriartorneranut akiuinissamut anguniagaqartoqarnissaa"-nik, taavalu aamma Parisimik isumaqatigiissummut peqataanissamut periarfissaqarluni.
Silap pissusia pillugu politikkissaq Kielsen naapertorlugu 2018-imi saqqummiunneqassaaq.
AAMMA ATUARUK Vittus: Silap pissusia pillugu isumaqatigiissut Nunatsinnut pitsaasuunngilaq
Taamaalinerani Nukissiuuteqarnermut imermillu pilersuinermik immikkoortumut pilersaarutissaq, nukinnik piujuartunik atuinerulernissamik ilaatigut pilertornerulersitsisussaq, tusarniaassutigineqaqqammerluni. Taava aamma nittartagaq Climate Greenland, sila pillugu paasissutissanik iliuusissanillu paasissutissiisoq, qanittukkut ilisaritinneqarluni.
Naallu aamma Namminersorlutik Oqartussat Bruxellesimi sinniisoqarfiat Bonnimi peqataatitaqanngikkaluarluni, EU-meersunik OLT-mullu ilaasortanik attaveqaqateqartuartoq, Kim Kielsen erseqqissaavoq
- Suliassat assigiinngitsut eqqarsaatigalugit ingerlaarput, sunaluunniit. Aamma imaanngilaq Kalaallit Nunaat atsioqataasimanngimmat, taava suliniutit assigiinngitsut ingerlanneqanngitsut. Maani nunatsinni aamma ingerlapput.
Sila pillugu Naalakkersuisoqalernissaa ilimananngitsoq
Aqqaluk Lyngeli naapertorlugu nunatta Parisimi isumaqatigiissummi, nunarsuup tamakkerluni kianneruleriartornerata agguaqatigiissillugu gradit marluk ataaniisinniarnissaanik pingaarnertut anguniagaqarfiusumi, peqataannginnera kanngusuusaarnarpoq.
Aqqaluk Lynge isumaqarpoq, sila pillugu oqallinneq Namminersorlutik Oqartussani atorfilittat politikerillu suliaanni qaffasinnerujussuamik Naalakkersuisut inissittariaqaraat. Naalakkersuisullumi uku taamaaliorpiartut, Kim Kielsen isumaqarpoq.
AAMMA ATUARUK Naalakkersuisut vil fortsat investere i vedvarende energi
- Maannakkut imermut aamma nukissiuteqarnermut tunngatillugu pilersaarut, taakkua suliarineqaruttorput aamma tusarniaassutigineqarput. Saniatigullu aamma sunniutigisarneraa, silap pissusaanut tunngatillugu pitsaaqutit ajoqutillu nunatsinni, taakkua massakkut paasissutissat pissarsiariniarerujoorpavut. Taava aamma qanutut iluaqutigisinnaanerivut siunissami oqariartuutigisinnaavarput.
Naalakkersuisut siulittaasuat Aqqaluk Lyngep kaammattuineratut silap pissusaanut tunngasumik suliaqartussamik naalakkersuisunngortitsissanersoq aperineqaramik, Kim Kielsen naatsumik akivoq.
- Naamik.
