Assi: Free/Colourbox/arkiv

Silap pissusia pillugu ataatsimeersuarneq Bonnimi ataasinngornermi aallartippoq

Naalagaaffiit Peqatigiit silap pissusia pillugu ukiumoortumik ataatsimeersuartitsinerat ullumi ataasinngornermi aallartissaaq, Parisimi 2015-imi isumaqatigiissut aalajangersaqqinneqassalluni. Ataatsimeersuarneq nunatsinnit peqataaffigineqanngilaq.

Silap pissusia pillugu ataatsimeersuarneq COP23 Tysklandimi illoqarfissuarmi Bonnimi aappassaanik ingerlanneqarpoq. Nunat Parisimi 2015-imi isumaqatigiissummik atsiueqataasut isumaqatigiissummik aalajangersaaqqinnissaat suliassat pingaarnersarissavaat.

Isumaqatigiissut taanna Nunatta peqataaffiginiarnagu toqqarsimavaa.

AAMMA ATUARUK Vittus: Silap pissusia pillugu isumaqatigiissut Nunatsinnut pitsaasuunngilaq

Silalli pissusia pillugu isumaqatigiissutip ukiut marluk matuma siorna atsioqatigiissutigineqarneranit, nunat CO2-mik aniatitsinerminnik millissaanissamut pisussaaffilerneqarnerannit, tassalu suliffissuaqarnerup pileqqaarneranit nunarsuup silaannaata kissatsikkiartornerata gradit marluk ataaniinnissaannik anguniaqalernermit, pisoqarsimaaqaaq.

Ilaatigut USA nunani CO2-mik aniatitsinerpaasut ilaat isumaqatigiissut peqataaffigiunnaarniarlugu aalajangersimavoq, 2020-milu novembarip qaammataani pisortatigoortumik peqataaffigiunnaassavaa.

AAMMA ATUARUK Tuskip silap pissusiata allanngoriartorneranut isiginninnera Nunatta sakkortusivaa

Bonnimi suliassat ilagissavaat USA-p tunuarternerata akiligassartaata agguataarneqarnissaa, nunammi pisuut nunani siuarsakkani silap pissusianut tunngatillugu ukiumut 100 milliardit dollarsinik tapiissuteqartarniarlutik neriorsuutigisimavaat.

Tamatuma saniatigut Naalagaaffiit Peqatigiit Avatangiisinik nakkutilliisoqarfiata nalunaarusiaani sapaatit akunnerata siuliani saqqummersinneqartumi erseqqissaatigineqarpoq nunat Parisimi isumaqatigiissummut peqataasut piumasaqaatit naammassigaluarpatigilluunniit ukiut hunnorujulikkuutaat tullianni nunarsuup silaannaa agguaqatigiissillugu ikinnerpaamik gradinik pingasunik kiannerulersimassasoq.

Danskit silap pissusia pillugu ministeriat novembarip 14-iani 16-ianut peqataassaaq, nunatsinniillu peqataatitsisoqassanngitsoq, Danmarkimi Nukissiuuteqarnermut, Pilersuinermut Silallu Pissusianut ministereqarfik taama ilisimatitsivoq.

AAMMA ATUARUK Lilleholtip Kalaallit Nunaata isumakulunnera paasisinnaavaa

 

Isummersuutit

inatsisartut_forarssamling_2017_nils_baum_bureau_for_inatsisartut.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat

...allarpassuillu!