Silap pissusaa Sikusarnera sivikillimmat piniartut eqqugaapput
Ukioq qaangiutilersoq kiannerusumik siuleqanngilaq, taamaanneralu nunatsinni inuussutissarsiortut misillerfigaat. Aammali siku maqaasiinnagassaanngilaq.
Ukioq 2016 silap kiassusianik uuttortaasalernermili nunarsuaq tamaat eqqarsaatigalugu kiannerpaavoq. Qalasersuaq aatsaat taama sikukitsigisoq, ilisimatuut aamma nalunaarutigaat.
Kianneruleriartorneralu nunatsinni sumiiffinni taamani malunnaqisoq oqaloqatitta tamarmik oqaluttuaraat.
Avanersuarmi
Avanersuaq Qaanaamiit aallarteriarta tamaanimi sikuusarnera sivikillivoq.
- Sikuniartarnera kinguarpoq, imarortarneralu siuarluni, siku saannerulerpoq, taavalu siornatigut aakkarneqarfiuneq ajortut amerlanerulerlutik, Qaanaami piniartoq Mads Ole Kristiansen taama oqarpoq
AAMMA ATUARUK Kalaallit Nunaat soqutigineqarluarpoq taamaattorli unammillernartoqarpoq
Siorapaluup eqqaani qaqqaq appaliarsoqarfik aasaq manna siallerujussuarmat eqqugaavoq.
Piniartoq Ikuo Oshimap ilaqutaasalu illuaraat appaliarsunnut kivitsiorfiat nuna sisoormat eqqugaavoq, appaliarsuillu kivitsat puut arfineq pingasut annaavaat.
- Appaliarsuit kivitsat puuniittut ikittuinnaat ukiormanna neqitugassarilerpagut Ikuo Oshima ukiut 45-it matuma siornatigut Japanimit Siorapalummut nunassissimasoq taama oqarpoq
Tunumi
Ittoqqortoormiini anorlikulanerulerpoq, siku aserortikulanerulerluni, piniartut piniutaarsertarnerannik nassataqartumik.
- Ittoqqortoormiuni piniartoq Aage Hammeken oqaluttuarpoq Ittoqqortoormiit avataa maannakkut imaannaasoq. - Piniartut aamma sunngiffimminni piniartut puisinut qassutaat arlaqartut anorlernerujussuata kingorna saavigussaapput, Aage Hammeken taama oqaluttuarpoq.
AAMMA ATUARUK Issittup imartaa uumasuerukkiartorsinnaasoq
Sila pillugu Danmarkimi ilisimatusarfimmiit KNR-imut allapput, Ittoqqortoormiit ullut 14-it ingerlaneranni, tassalu qaammammik kingusinnerusumik, sikussangatikkitsik. Ittoqqortoormiini eqqaanilu oktoberimi novembarimilu neruminnerummat anorlikulanerummallu, sikuniarnera sivisunerusoq, DMI-mi sikumik immikkut ilisimasalik Jens Jakobsen allappoq.
Kujataani
Nunatsinni nunaqarfiit kujallerpaat ilaanni kangerluk ukiup taamaalinerani sikusaraluarpoq.
- Ukiup taamaalinerani umiarsualivik issulaartumik sikusaraluarpoq, kisianni ulloq manna tikillugu annerusumik sikunianngilaq.
Hans Levisen Nanortallip kangiani Aappilattormiu taama oqarpoq.
AAMMA ATUARUK Silap pissusiata allanngoriartornera umimmaat akornutigigaat
Kianneruleriartornerali upputissaannaanngilaq. Kuummiut, qanga sikusaraluartut, Boas Boassenip ukioq manna sikussangatikkunaarpaa, tamannalu annermik nuannaarutissaavoq.
- Sikugaangat annerusumik qimmit iluaqutigisarpaat. Sikugaangat umiatsiaararsortut iluaqutigisarpaat, qaleraleqarpoq suluppaagaqarpoq, qeeraqarpoq immatsinniittullu piniagassat tamaasa Kuummiuni pigivagut, Boas Boassen taama oqarpoq.
