Sikup Qeqertarsuup tunua asserpaa
Arina Arctica Aasiannut Ilulissanullu pajukkaluarluni uniinnarpoq. Tassani kitaani sikup issuallaalersimanera pissutavoq.
- Arina Arctica-mi umiarsuup naalagaata silassaq misissuataareerlugu nalilerpaa kitaata sikua qaangersinnaassanagu tullissaanilu misiliinissaq utaqqiinnartariaqarlugu, Royal Arctic Line nalunaarpoq.
Kitaa tamakkerlugu issilerpoq issillu oqiliartunnginnerata kingunerisaannik kitaata avataa sikusimavoq. DMI'llu ilimasaarutaa malillugu sapaatip akunnera aggersoq issiinnavittussaavoq.
Taamaammat Arina Arctica Aasiannut Ilulissanullu apuunniarinnaaginnarpoq umiarsuullu usii Nuummut oqqunneqartussanngorput.
Sikuniarnera nalilersorneqareerpat Aasiannut Ilulissanullu umiarsuarmik pajuttoqaqqissanersoq naliliiffigineqarumaarpoq.