Sikuiuitsup aalisarfigeqqusaannginnera isumaqatigiissutigineqartoq
Isumaqatigiissummik nutaamik atsiortuupput Rusland, Nunat Natomut ilaasortaasut, Canada, Norge aamma Danmark. Taama aalajangerneq nunarsuarmioqatinut malugitissallugu pingaaruteqartoq Danmarkip issittumut ambassadøria Erik Vilstrup Lorenzen Politiken.dk-mut oqarpoq.
- Isumaqatigiissuteqarnitsinni takutipparput atituumik isumaqatigiittoqarsinnaasoq, naak nunat assigiingitsut akornanni sillimanartorsioraluartoq. Takutipparput Issittoq nunarsuup sinnerannut naleqqiulluni sillimaniarnapallaartuunngitsoq, nunat siuttui naapissinnaasarlutik isumaqatigiissusiorlutillu, ambassadøri oqarpoq.
Aviisi Politiken oqaluttuarpoq, nunat tallimat issittup imartaanut sineriallit aalisarnermik killiliiniaraluartut, oqaaseqartartut arlaqartut aalajangerneq nuannaarutigaat. Uparuarneqarporli isumaqatigiissut siaruarlugu aamma EU-mi Kangianilu nunat aalisarnermik annertuumik ingerlataqartut ilanngunneqartariaqaraluartut, tamakkumi aamma imaannarmi aalisartarmata.
- Taamatut isumaqatigiissusiortoqassappat suliassap tullerisariaqarpaa, nunat soorlu Kina, Spania, Japan, Tuluit Kunngeqarfiat, Korealu Kujalleq aamma atsioqataasariaqartut, Alexander Shestakov Politikenimut oqarpoq. Angut taanna WWF-ip, tassa pinngortitaq pillugu nunarsuaq tamakkerlugu suliniaqatigiiffiup Issittumut tunngasunut aqutsisoraa.
