Ataatsimiinneq: Inatsisartut ullumi naggammik ataatsimiipput
Soraarnerussutisiaqalernissamut aningaasaatit Kalaallit Nunaanni angerlarsimaffeqartut akileraaruserneqartarnerat, aamma avataaneersunut sulisussanut, Namminersorlutik Oqartussat sinnerlugit mittarfiliassanik suliaqartunut,
ilanngaasiinnginnermi akileraarutinut aaqqissuussineq pillugu oqaluuserisassaq pingajussaaneerneqassaaq.
Imigassaq pillugu inatsisissatut siunnersuut oqallisaangaatsiarsimasoq, peqqissutsimut naalakkersuisup Agathe Fontainip sulissutigisaa ullumi pingajussaaneerneqassaaq. Inatsisissatut siunnersuutip siunertaraa imigassamik atornerluinerup kingunerisinnaasai pillugit meeqqat inuusuttullu illersorneqarnissaat.
Kalaallit Nunaanni aalisarnermi pisarineqartut isumalluutinik atuinermut akitsuutaat pillugit Inatsisartut inatsisaat
oqaluuserineqassaaq. Matumani periuseq nutaaq aqqutigalugu ukiumut 50 milliuunit koruuninik landskarsimut isertitaqartarnissaq qulakkeerniarneqarpoq.
Nunaqarfinni tamani kommuneqarfogedeqalernissaannik suleriaasissamik siunnersuusiortoqarnissaa
anguniarlugu Naalakkersuisut Danskit Inatsiseqarnikkut naalakkersuisoqarfiannut saaffiginnissaat pillugu
siunnersuut aappassaaneerneqassaaq.
Oqaluuserisassani kingulleq tassaavoq 2018-mut aningaasanut inatsisissatut siunnersuut pingajussaaneerneqaluni taasissutigineqassaaq.
Inatsisartuni oqaluuserisassat inatsisartut.gl-imi atuarneqarsinnaapput
