VIDEO Sermillip Qinnguani ukiualunnguit qaangpiuppata umimmanniartoqarsinnaalissaaq

Umimmaat 19-it Ivittuuneersut najukkaminnut nutaamut Nanortallip eqqaaniittumut Sermillip qinnguaniitumut maanna sungiussinialeruttorput.
Allattoq Elisa Isaksen
oktobarip 22-at 2014 10:23

Umimmaat taakku 19-it qaammatip ataatsip matuma siornatigut Ivittuut eqqaanni katersorneqarput inunnillu aqqaneq marlunnit nuunneqarlutik, tassaasunit uumasut nakorsaat marluk, piniarnermik nakkutilliisut marluk, Kommune Kujallermi sulisut, angallammilu Usisumeersut.

Arnavissat angutivissallu amerlaqatigiissinniarneqassasut, Pinngortitaleriffik piumasaqarsimavoq, taamaammat umimmaat nuunneqartut tassaapput arnavissat aqqaneq marluk, angutivissallu arfineq marluk. Umimmaat ataatsimik marlunnillu ukioqarput.

Kommune Kujallermi piniartut ullumikkut umimmanniarniaraangamik Ivittuuliartariaqartarput, siunissamili umimmaat amerlippata, kommuniminni umimmanniartalersinnaalissapput.

Umimmaat maanna eqqissisimatitaalluinnarput.

Piniarnermut Naalakkersuisoqarfik umimmaat nuunneqarnissaasa pilersaarusiornerini piumasaqarsimavoq Sermillip qinnguata naasoqarnera misissuiffigineqassasoq, umimmaat tamanna siunissami neriniarfigisussaammassuk.

Umimmaat Kommune Kujallermit nakkutigineqassapput. 

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq