Sermersuup uppernarsarpaa: Kattuffinnik suleqateqarneq unitsinneqarpoq
Sulisut kattuffii arfiniliusut kommuneqarfiup pisortaanerata ataatsimeeqatigineranit aniinnarput, "kommunip sulisullu kattuffiisa ataatsimeeqatigiittarnernut naatsorsuutigisaasa assigiinngissuteqarnerat" tunngavilersuutigalugu.
Kattuffinnik suleqateqarnerup unitsinneqarnera kommunimit maanna uppernarsarneqarpoq, kattuffiit toqqaannartumik kommunimut isumaqatiginninniarsinnaallutik naatsorsuutigisimagaat ataatsimiinnermi kommunimit paasineqarmat.
AAMMA ATUARUK Kattuffiit Sermersuup ataatsimeeqatiginerani ataatsimiinneq qimaannaraat
Ataatsimiinneq pineqartoq, soraarsitsiortornermut atatillugu suliatigut kattuffiit suliap ingerlaneranik ataavartumik paasitinneqartarnissaat qulakkeerniarlugu, ilaasortaminnullu piareersaanissaminnut periarfissaqarluarniassammata, piumasaqaataanngitsumik suleqatigiissitami ataatsimiinnertut kommunimit isigineqarpoq.
- Kommunimi Pingaarnertut Suleqatigiinnissamut Ataatsimiititaq isumaqatiginninniartussaatitaavoq, tamannalu soorunami ataqqivarput, pisortaaneq Steffen Ulrich-Lynge ullaaq manna taama nalunaaruteqarpoq, imatullu nangilluni:
- Suliamut tassunga atatillugu suleqatigiinneq taamatut unittariaqarmat soorunami ajuusaarutigaarput. Kommune suliatigullu kattuffiit ataatsimoorlutik pisumi ilungersunartumi sulisunik isumaginninnermik suleqatigiinnissaat neriuutigisimagaluarparput.