Asii Chemnitz NarupAssi: Jonas Fievé/KNR

Sermersuup inatsit tuaviuussaq 135 millionit koruuninik naleqarsinnaanera ernummatigaa

Naalakkersuisut inatsit tuaviuussaat, avataanit tikittunut, mittarfiliornermi sulisorineqartussanut, akileraarusiisarnissamut tunngasoq, Kommuneqarfik Sermersuumut 135 millionit koruuninik naleqarsinnaavoq.

Taamaammat kommuni siunnersuummut akerliulluni Naalakkersuisut tusarniaassutaannut allappoq.

Inatsisissatut siunnersuummi avataanit suliartortut, Qaqortumi, Nuummi Ilulissanilu mittarfiliornissamut pilersaarutini sulisussatut naatsorsuutigisat akileraarutissaat kommunit nunattalu karsiata akornanni agguaanneqaratik nunatta karsianut nakkartarnissaat pineqarpoq.

Kommunit ataasinngormat tusarniaassuteqarnissamut akunnernik arfineq-marlunnik periarfissinneqarput, Kommuneqarfik Sermersoorlu arlalitsigut inatsisissatut siunnersuummut isornartorsiuivoq.

AAMMA ATUARUK Inatsit tuaviortup mittarfiit aningaasalerneqarnissaat qulakkiissagaa

Siullertut, inatsimmik allannguineq kommunip karsianut 135 millionit tikillugit akeqarsinnaanera missiliorpaa. Tulliattut, Namminersorlutik Oqartussat pilersaarutaat allat taamaattussaannartut isigalugit akileraarutitigut immikkut pineqarlersinaanerat kommunip aarleqqutigaa.

Inatsit allamiunik sulisoqarnissamut pilerinarnerulersitsissasoq, Kommuneqarfik Sermersuup SIK-itulli ernummatigaa, allamiut akileraarnikinnerusussaammata:

- Ajornartorsiutini annernut ilaavoq, siunnersuummi nunaqavissunik atorfinitsitsinissaq ajornarnerulissammat, taakkuami nalinginnaasumik akileraarussaapput, taamaalillutillu aamma nalinginnaasumik isumaqatigiissutillu malillugit aningaasarsiaqartussaallutik. Taamaalillunilu Nuummi timmisartoqarfiliornerup aningaasarsiornikkut qiimmassaatissatut naleerutissaaq, Kommuneqarfik Sermersooq tusarniaanermut akissuteqarluni allappoq.

Inatsisissatut siunnersuut Inatsisartunit sapaatip akunnerani matumani oqallisigineqarpoq ataasinngorpallu inaarutaaasumik suliarineqassalluni.

Siunnersuut Naalakkersuisunut, mittarfinnik pilersaarutip aningaasanut inatsimmi ataasinngorpat pingajussaarneqartussap aningaasalerneqarnissaanik unammilligaqartunut, pingaaruteqarpoq.

AAMMA ATUARUK Inatsit tuaviuussaq tusarniaassutigineqassasoq

Isummersuutit

inatsisartut_forarssamling_2017_nils_baum_bureau_for_inatsisartut.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat

...allarpassuillu!