Sermersuup eqqagassalerinermi suliniutaa nutaaq nersualaarneqartoq
- Eqqagassat pillugit nalunaarusiap ukiamut nalilersorneqaqqinnissaa pillugu, inuit tamat ingerlaarfiini illoqarfinni nunaqarfinnilu sumiiffinni sikaritsit sinnikuinut eqqaavissanik matoqqasunik kommunit ikkussuinissaanik peqqussuteqarnissaq akuerineqaqqullugu, naalakkersuisunut inassuteqaateqarnissannik siunnersuuteqarpunga, Juliane Henningsen oqarpoq.
Upernavimmi ukiualuit matuma siorna akunnerit marluk ingerlanerinnaani sikaritsit kimmivikui 48 kilot sinnerlugit katersorneqarsimaneri, Ilulissanilu 70 kilot akunnerit pingasut ataallugit katersorneqarsimaneri ajornartorsiummut takussutissaapput.
AAMMA ATUARUK Sermersooq eqqagakinnerulersitsiniarpoq
Kommunit akisussaaffigaat
- Suliniutit taamaattut nersugassaapput - inuuffigisatsinni kusanartumik isigisaqarnissaa kisiat tunngaviginagu aammali eqqagassanik ajornartorsiuteqarnerput annertusiartuinnavissoq eqqummaariffigineqarnerulerluni aallunneqarnerulernissaa anguniarlugu, Juliane Henningsen oqarpoq.
Kommunit eqqaavinnik inoqarfinni illoqarfiusuni nunaqarfiusunilu ilioraasussaatitaapput. Eqqaavinnulli sikaritsikunik igitsisissartik inuit ilaasa toqqissisimanartittanngilaat, ikuallalersoortoqarsinnaanera pillugu. Tamanna peqqutigalugu pujortartarnermik inerteqquteqarnermi inatsimmi allassimavoq pujortartarfiusinnaasuni sikaritsit sinnikuinut matoqqasunik eqqaaveqassasoq. Assingusumilli sumiiffinni ammasuni piumasaqaateqartoqanngilaq.
