Sermersuup aningaasatigut missingersuutai aappaagumoortut iluatsipput
Missigersuutit 2016-moortut saqqummiunneqarnerat aallarnerlugu, kommunip aningaasaqarnera erloqinartutut aallartissimagaluartoq maanna pitsanngorsimasutut oqaatiginerani, tamanna H.C. Andersenip oqaluttualiaanut, qeerlutuuararnap qussunngornernut assersuunneqarpoq.
Taama assersuussinerminni eqqarsaatigisaat tassaavoq, Kommuneqarfik Sermersooq aningaasatigut pitsaasumik 2016-imi inississimassasoq naatsorsuutigineqarami.
Kommunip aappaagumut aningaasatigut ingerlalluarnissaanik neriuuteqarnermi, sanaartornermut missigersuutit, 200 millioner koruunit missaanniittut attatiinnarneqassasut politikerit aalajangiipput - kommunillu pitsaasumik ineriartornera attatiinnarneqarnissappat tamanna pisariaqartoq borgmesteri oqarluni.
Kommuneqarfik Sermersooq kommunit aningaasatigut nalimmassarneqarnerannut annertuumik akiliisarpoq. Aamma aappaagu 2016-imi, kommuni kommuninut allanut katillugit, 230 millioner koruuninik akiliisussaavoq.
Kalaallit Nunaata sinneratut Kommuneqarfik Sermersuummi aalisarneq takornariaqarnerlu pingaarnertut aningaasatigut isaatitsissutaasarput. Taakkulu eqqarsaatigalugit ukiuni tulliuttuni taakkua, akileraarutitigut aappaagu isaatitsiviugaarnissaat kommunimit naatsorsuutigineqanngilaq.
Meeqqat inuuniarnikkut ajortumik eqqugaasut, ilinniartitaanermut aamma peqqissutsikkut kommuni aningaasartuuteqagaatsiartussaasoq naatsorsuutigineqarportaaq.
Kommuneqarfik Sermersuup aningaasatigut aappaagumut missigersuutaat nalunaaqutaq aqqanermiit, tassa maannakkut saqqummiunneqarput. Tamannalu pillugu ulloqeqqanut radioaviisimi annertunerusumik tusagassaqassaagut.
