Sermersuup aakkiartornera iluaqutissartaqarpoq
Maannalu ilisimatusarnerup paasinarsisippaa sermersuup aakkiartornera Nunatta imartaani uumasunut iluaqutaasinnaasoq.
Sermersuup aanneranit imeq immap naasuinut uumasuinullu pingaarutilinnik inuussutissaqarpoq, Bristol Universitetimit ilisimatusarnerup tamanna uppernarsigaa, Daily Express allappoq.
Nunatta sermersuanit imeq aattoq fosforimik 400.000 kubikmeterisut annertutigisumik akoqartoq, issittup imartaanut siaruaannisaa ilimagineqarpoq.
Fosfori inuussutissaavoq pingaarutilik immallu naqqani planktonit amerlinerinik kinguneqassinnaalluni, tamannalu aalisakkat uumasullu timmissallu imarmiut issittup imartaani amerlinerinik kinguneqarsinnaasoq, ilisimatusartut isumaqarput.
Fosforilu quajaatit qeqqussallu ilaasa amerlinerinik aamma kinguneqarsinnaavoq, taakku kustoffimik tigooqqaasarput taamaalillunilu ikummatissanit uuliameersunit aamarsuarneersunillu silaannarmut aniasitsineq millisissinnaallugu.
Dr. Jon Hawkings ilisimatusartullu allat, ilaatigut imermik misissugassanik katersuiartorlutik qaammatini pingasuni 2012-imi 2013-imilu nunatsinniittut, misissuinermik suliaqartuupput.
