Avatangiisit

Paasisat nutaat: Sermersuup aakkiartornera ilimagisamit sukkanerusoq

Nunarsuup imaviisa silap pissusiata allanngoriartornera pissutigalugu qaffakkiartornerat amerlanerit nalugunanngilaat. Ilisimatuulli ilimagisaannit tamanna sukkanerusumik pivoq, tamannalu Sermersuup ilimagisamit sukkanerusumik aakkiartorneranik pissuteqarpoq. Ilisimatusaatigineqartup nutaap danskinit peqataaffigineqartup tamanna takutippaa.
Assi © : Terry Feuerborn/Flickr Creative Commons
Allattoq Kenneth Elkjær
septembarip 22-at 2016 10:44
Nutserisoq Simon Uldum -

Ilisimatuut siornatigut isumaqaraluarput imaviit ukiut 23.000-it ingerlanerini 3,2 meterinik qaffassimasut. Ilisimatusarnerulli nutaap takutippaa imaviit 4,6 meterinik qaffassimasut, tamannalu sermersuup aakkiartornerata ilimagisamit sukkaneruneranik pissuteqarpoq. 

Ilisimatusaatigineqartoq nutaaq atuagassiami Science Advancesimi saqqummersiunneqaqqammertoq, Sermersuullu aakkiartorneranik ukiuni arlalinni misissuinerit siullersaralugu. Allaaserinnittut ilaat, DTU Spacemi lektori Shfaqat Abbas Khan taama oqaluttuarpoq.

- Siunissami qanoq pisoqarumaarnera iluameersumik oqaaseqarfigissagaanni ukiut tuusintit arlallit kingumut qiviaqqaartoqartariaqarpoq, DR-imut taama oqarpoq.

Nunatta Sermersua tamakkerlugu siornatigut misissuiffigineqarsimanngilaq. Sermersuullu aakkiartornera Nunatta kujataata-kangisissortaani aamma avannaata-kippasissortaani pinerusartoq paasineqarpoq, taakkunani sermit aakkiartornerat aakkiartortoqarnerata tamarmiusup 70 procenteralugu.

- Tassaniipput iigartarfissuit anginerpaat, taakkulu imavissuarnut toqqaannartumik atassuteqarput. Tassa imaappoq, silaannaap kiannerulernera imaatalu kiannerulernera pissutigalugit aakkiartorput. Tamanna arajutsineqarsimavoq, taamaammat aamma sunniutissaa minnerusutut nalilerneqarsimalluni, Shfaqat Abbas Khan DR-imut taama oqarpoq.

Sermersuaq tamakkerluni aakkaluarput nunarsuup imavissui 7,5 meterinik qaffassagaluarput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq