Sermersuumi timersortarfiit siuarsarneqarluartut
- Pigeriikkatsinni aserfatsaaliinerit taamaalillutik sukkanerusumik naammassineqarput. Taamaalillunilu siunissami aamma sipaartussanngorpagut, siuarsaratsigit taakku iluarsaanneqartussat, Kommuneqarfik Sermersuumi borgmesteri Asii Chemnitz Narup oqarpoq.
Kommunip AWG-mut toqqaannartumik aningaasartuutimi 22 millionit koruunit saniatigut 17,6 millionit koruunit atorpai.
Kommunip 1,8 millionit koruunit sanaartukkanut, soorlu sisoraaserluni ooqattaasartarfimmut allanullu, kingusinnerusukkut aamma atorneqarumaartunut, atorsimavai. Nuummi timersortarfinni perusuersartarfiit, qulliillu iluarsartuunneqarmata 6,2 millionit koruunit aningaasartuutigineqarput. Taakkunannga nukappiaqqat niviarsiaqqallu immikkut uffartarfeqarnissaannut piumasaqaatit saniatigut naammassineqarput.
Aamma atuaruk VIDEO AWG-mut millionerpassuit atorneqartut iluaqutaalluarput
- Piumasaqaatit annertuut naammassiniartussaasimavagut Arctic Winter Gamesertitsisussatut. Piumasaqaatinullu angummassinnaanersugut ukiuni kingullerni arlaleriarluta international kommitteeminngaanniit tikeraarneqartarpugut nakkutigineqarluta, ilumut taakkua piumasaqaatit naammaginartumik naammassisinnaanerigut. Taamaattumik tassuunakkut pikkunakullannikooqaaq, borgmesteri oqarpoq.
Nuummi timersortarfinnik atuarfinnillu aserfallatsaaliuinermut pitsanngorsaanermullu 9,5 millionit koruunit Kommuneqarfik Sermersuup ukiut pingasut ingerlaneranni aamma atorpai.
Kommuneqarfik Sermersuumilu illoqarfiit allat timersortarfiutaat mininneqassanngitsut, borgmesteri erseqqissaavoq.
- Eqqaamaneqassooq ukiut amerlasoorsuunngitsut matuma siorna Paamiuni timersortarfik oqummat 13 millionit koruunit tungaannut aningaasaliilluta iluarsaasserujussuarnikuuvugut. Tullinnguuttariaqassooq, uanga isumaga malillugu, Tasiilap illoqarfiani timersortarfiup iluarsaannissaa, Asii Chemnitz Narup oqarpoq.
