Sermersuumi sipaarniarnerup pissakinnerit eqqussavai
Missingersuutit saqqummiunneqarmata kommune aappagu 82 millioner koruuninik sipaaruteqassaaq.
Ikiorsiissutinik tapiissutit ikilisinneqassapput.
Atuarfinni atuartut amerlassusii ikilisinneqassapput
Aqquserngit aserfallatsaalineqartarnerat ukiut tamaasa pisaraluartoq ukiut pingasut qaangiukkaangata aserfallatsaalineqartalissapput.
Nunatsinni illoqarfiit anginersaannut Nuummut suliffissaaleqillutik nuuttartut 15 procentii ikiorsiissutinik pisartagaqartut sipaarfiginiarneqarput.
- Suliffissaaleqillutik Nuummut nuttarneq pakkersimaarniarlugu ikiorsiissutinik tapiissutit ikilineqarnissaannut aalajangerpugut - aamma nunatsinni kommuneqarfiit allat tunniuttagaannut sanilliussisinnaarusulluta taama aalajangerpugut, tamanna Qeqqata Kommuneata tunniuttagaanut 2015-mut naapertuuttunngussapput, Asii Chemnitz Narup oqarpoq.
- Nunatsinni innuttaasut Nuummut nuttarnerannut pissataasoq ilaatigut tassaavoq nunarsuarmi tamarmi inuunermik oqinnerusumik ujartuillutik illoqarfinnut inuttunerusunut nuuttarmata, nunatsinni pissuseq tamanna aamma takusinnaavarput, Asii Chemnitz Narup oqarpoq.
Aqquserngit aserfallatsaalineqartarnerat ukiut tamaasa pisaraluartoq ukiut pingasut qaangiukkaangata aatsaat aserfallatsaalineqartalissapput. Nunatta eqqiluitsuutinnissaanut innuttaasut peqataanerulersinneqassapput.
- Ukioq allortarlugu aserfallatsaaliisarneq pisarunnaarnerisigut sipaaruteqartoqassaaq aamma saliisarnerit saliisitsisarnerillu sipaarfigineqarput, suliniut “Saligaatsoq” aqqutigalugu innutaasut peqataasalernikuummata isumaqarpugut tamanna illersorneqarsinnaasoq, Kommuneqarfik Sermersuup borgmesteria oqarpoq.
Aqquserngit aserfallatsaalineqarnerinut sipaaruteqarnermi sulisunik soraarsitsisoqassanngilaq, avataaniilli suliakkiisarneq atorunnaarsinneqarluni.
Atuarfinni atuaqatigiiaat agguaqatigiissillugu 20sarsimasut amerlineqassapput, tamannalu ilinniartitsisunik ikilisaanermik kinguneqassanngilaq.
- Atuarfinni klasseni ataasiakkaani atuartut agguaqatigiissillugu 22nut amerlineqassapput. Klasset amerlineqarpata sipaaruteqartoqarsinnavoq, atuartulli klasseni amerlineqarpata ilinniartitsisunik ikilisaasoqassanngitsoq, Asii Chemnitz Narup oqarpoq.
Kommuneqarfik Sermersuup borgmesteriata Asii Chemnitz Narup kommunip aappaagumut missingersuutai saqqummiukkamigit taama oqarpoq.
- Kommuneqarfik Sermersuup oqaluttuarisaanerani missingersuusiornermi aatsaat taama ilungersunartigisumik imaannaanngitsigisumillu missingersuusiorpugut - oqitsuinnaanngilaq, - akisussaassusilimmik iliorniaraanni ukiuni ilungersunartorsiorfiusuni annertuunik ilungersunartunillu aalajangiisinnaassuseqaratta nuannaanngikkaluaqaluta allatut iliorsinnaannginnatta sipaarutissat taakkua sipaaruteqarfigaagut, Asii Chemnitz Narup oqarpoq.
Kommunit nalimmassarneqarnerannut kommuneqarfik Sermersooq 54 millioner koruuninik aningaasaliinermi saniatigut 3 million koruuninik sipaaruteqarpoq.