Sermersuumi ilungersuussilluartoq nersornaaserniarneqartoq
Piukkussaqaruit immikkut ittumik suliniuteqarsimasorisat nersualaarneqartariaqartorlu maannakkut innersuunneqarsinnaalerpoq.
Kommuneqarfik Sermersuup ukioq manna pilersinneqartoq ”ilungersuussilluartumut nersornaat”, innuttaasumut kommuninut allanut iluaqutaasumik, immikkut ittumik suliniuteqarsimasumut tunniunniarpaa.
Ilungersuussilluartumut nersornaat illoqarfimmi, nunaqarfimmi kommunimiluunniit tamanut ilungersuussilluarsimasumut tunniunneqassaaq.
Nersornaat inuussutissarsiornermut, kulturikkut inunnilluunniit sullissinermut sunniuteqarluarsimanermut tunngassasoq, kommuni nittartakkamini allappoq.
Ukioq manna nersornaasiinermi ajugaasoq, Nuuk Centerimi tamanut novembarip 30-ani saqqummiunneqassaaq.
Kommunip nittartagaani innersuussisoqarsinnaavoq.
Nersorneqartariaqartumik innersuussisut akornannit Ipad-imik eqqugassartalimmik makitsisoqarumaartoq, kommuni neriorsuivoq.