Sermersuup borgmesteriata naammagittaalliutigineqarnera Nakkutilliisoqarfiup akerlileraa
Siumumeersut marluk, Peter Davidsenip aamma Ane Egede Mathæussenip, upernaaq kommunimut qineqqusaarnerup nalaani borgmesteri Kommunit Nakkutilliisoqarfiannut naammagittaalliutigaat.
AAMMA ATUARUK Borgmesteri nakkutilliisunut unnerluutigineqartoq
Politikerit taakku marluk, Asii Chemnitz Narup kommunip illoqarfimmik ineriartortitsinissamik suliniutaanut angisuumut - Siorarsiorfimmut - tunngatillugu Sermersuumi innuttaasunik kommunimilu politikerinik salloqittaasimasutut unnerluutigaat.
- Borgmesterip, Asii Chemnitz Narupip (IA), saqqummiinermini siulersuisunut ilaasortat kommunimilu innuttaasut isumaqartilersimavai Siorarsiorfimmut tunngasoq pilersaarutit malillugit 4-5 mia. koruuninik nalilik aallartingaatsiareerneqareersimasoq, Peter Davidsen Ane Egede Mathæussenilu qineqqusaarnerup nalaani allakkani tamanut ammasuni taama allapput.
Taamatulli unnerluutiginninnerat Kommunit Nakkutilliisoqarfiannit akerlilerneqarpoq. Sermitsiaq.ag naapertorlugu, Nakkutilliisoqarfik inerniliivoq kommunalbestyrelsimi ilaasortat innuttaasullu suliniutip suliarineqarneranut peqataatinneqarsimasut.
AAMMA ATUARUK Per Berthelsen Siumumi ilaasortaajunnaarniarpoq