Sermersuarmi juulimi kiannerpaaffiusoq nillernerpaaffiusorlu qaangerneqartut
Ilisimatusarfimmi Summittimi -33 gradinik issitsigisimavoq. Tamannalu Summittimi juulip qaammataanut tunngatillugu rekordiliineruvoq. Siornatigut rekordiusoq - 30,7 gradiugaluarpoq, DMI-mi Nunatsinnut tunngatillugu immikkut ilisimasalik, John Cappelen, taama ilisimatitsivoq.
- Qeqertarsuup kitaani naqitsiniisaffiup silaannaq nillertupilussuaq Kalaallit Nunaata tungaanut ingerlaartippaa tamannalu pissutaalluni nillissutsimut rekordiliisoqarpoq, nittartakkamut dmi.dk-mut taama oqarpoq.
Juulip 28-ani naqitsinertuffik naqitsiniisaffittulli aamma pisoqartitsivoq - tamatumuuna kiassutsimut rekordiliinermik kinguneqarluni.
- Juulip naalernerani naqitsertuffik Kalaallit Nunaata qiterpassuaniippoq. Silaannarlu ammut ingerlaartoq pissutigalugu juulip 28-ani ualikkut Sermersuarmi qaqutigoortumik kiappoq. Immaqa annertugisassaanngilaq, 1,9 gradinilli kiatsiginera juulip qaammataanut kiassutsitigut rekordiliineruvoq, John Cappelen taama oqaluttuarpoq.
DMI Summittimi silamik 1991-imiilli nalunaarsuisarpoq. Kiannerpaaffittullu uuttortarneqarsimasoq tassaavoq + 4,4 gradit, nillernerpaaffittullu uuttortarneqarsimasoq -63,34 gradiulluni.
