Avatangiisit

Sermersuaq oreganomik annaanneqarsinnaasoq

Akuutissaq Oregano nerisassiornermuinnaq atorneqarsinnaanngilaq. Laboratoriamimi misileraanerit takutippaat nersussuit nillaavallaarunnaassutigalugulu nissaassutigivallaarunnaarsinnaagaat, Danmarkip Radioa nittartakkamini taama allaaserisaqarpoq.

Allattoq Camilla Dam

januaarip 28-at 2015 10:48

Metangassi nersussuit nilerlutik nissaallutillu aniatittagaat, kuldioxidip saniatigut gassit nunarsuarmik kissatsitsisartut inuup pilersitaasa annerit aapparaat taamaalillunilu nunarsuup kissatsikkiartorneranut peqqutaaqataalluni.

Taamaammat oregano nersussuit aqarajuini qanoq sunniuteqartarneranik Danmarkimi Nersutit pillugit ilisimatusarfimmi ilisimatuut ukiuni sisamani ingerlasussamik ilisimatusarniarnerat paasinarpoq.

- Nersussuit oreganotortinnerisigut metanimik aniatitsinerisa annikillisinneqarsinnaanissaa neriuutigaarput, ilisimatuut pisortaat Peter Lund DR Midt & Vest-imut taama oqarpoq.

Aamma atuaruk Sermersuaq allanngujuitsoq

Inuup pilersitaanik nunarsuup kissatsikkiatornerata 16 procentia metanimit pilersitaavoq, DR taama allappoq.

Nillaasaruit, taava oreganotorneq aqajaqqumut iluaqutaasinnaavoq, nilivilli avatangiisinut qanoq sunniuteqarnissaa ilerasuutigisariaqanngilat - tipaa eqqaassanngikkaanni.

- Inuit metanimik aniatitsisorsuunngillat, oreganolli sunniutai inunni aamma taamannissaat ilimanarpoq, ilisimatuut pisortaat taama Peter Lund.

Sermersuuttaaq aakkiartornerani metangassimik aniasoqartarpoq.