Sermersooq utoqqaat angerlarsimaffiini ulloq unnuarlu ikiorsiilerniartoq
Angerlarsimaffimmi ikiorteqartarneq Nuummi Tasiilamilu aallaqqaammut neqeroorutaassaaq, ukioq manna neqeroorutaalissalluni. Tamanna iluatsissappat angerlarsimaffimmmi ikiorteqartarnermut aaqqissuussineq Paamiuni aappaagu atuutilersussatut siunniunneqartoq, Kommuneqarfik Sermersuup nalunaarutigaa.
Inuti 65-init 99-it tungaannut ukiullit Kommuneqarfik Sermersuumi najugaqartut ukiut 20-t tulliuttut ingerlaneranni marloriaatinngorsimanissaat Kalaallit Nunaanni Naatsorsueqqissaartarfiup naatsorsuutigaa, utoqqaallu pitsaanerusumik siunissami atugassaqartinneqarnissaat ulloq unnuarlu ikiorteqarsinnaanissamut neqeroorutip annertusineqarnissaanut tunuliaqutaasoq kommunip oqaatigaa:
- Taamaaliornikkummi toqqissisimanartumik namminneq angerlarsimaffimminni innuttaasut naleqarluartumik utoqqaliartornissaat angorusupparput, Charlotte Ludvigsen, Kommuneqarfik Sermersuumi Isumaginninnermut Suliffeqarnermullu Ataatsimiititami siulittaasoq oqarpoq.