Sermersooq: Nakorsanit sullinneqarnermi allanguisoqartariaqarpoq
Peqqinnissamut isumaginnittoqarfimmi allanguinissamut suli pisariaqartitsivugut taamaattumik oqaloqatigiittariaqarpugut.
Taama kaammattuuteqarluni oqarpoq, kommuneqarfik Sermersuumi borgmesteri Asii Chemnitz Narup Peqqissutsimut Naalakkersuisumut Martha Lund Olsenimut, Illoqqortoormiuni nakorsatut atorfiup atorunnaarsinneqarnissaanik siunnersuut taamatinneqarnerata kingorna.
- Siullermi kissaatigivara Peqqissutsimut Naalakkersuisuugallartoq uangalu tatigeqatigiilluta oqaloqatigiissinnaassasugut suleqatigiinnissamut piumassuseqarluta nutaaliornikkut aaqqiissuteqarluta Illoqqortoormiormiunut, Kommuneqarfik Sermersuumi borgmesteri Asii Chemnitz Narup taama oqarpoq.
Aamma atuaruk Illoqqortoormiuni Qaanaami Qasigiannguanilu nakorsatut atorfiit ataannassapput
Illooqqortoormiuni nakorsaqarniarnera pillugu aaqqigallartoqarnissaq Asii Chemnitz Narup kissaatiginngilaa
- Illoqqortoormiormiut peqqissaqarnikkut peqqinnissakkut sullinneqarnerat nakorsaqarnissaallu qulakkeertariaqarpoq, - Illoqqortoormiut illoqarfinnut nunaqarfinnullu allanut avinngarisimasumik inissisimavoq taamaatumik nakorsanit isumagineqannginera illersorneqarsinnaanngilaq, Asii Chemnitz Narup oqarpoq.
Paamiuni sullissinermut assingusumik
Kommuneqarfik Sermersuup borgmesteriata Peqqissutsimut Naalakkersuisoq Martha Lund Olsen siunissami suleqatigiinnissaq pilugu ataatsimeeqatiginissaanut aggersapaa sulili akissuteqarsimanani.
Borgmesteri suli isumaqarpoq, peqqinnissaqarfiup Illoqqortoormiuni sullissinera eqqarsaatigeqqinneqartariaqartoq.
Asii Chemnitz Narup siunnersuuteqarpoq, peqqinnissaqarfiup Paamiuni sullissineranut assingusumik aaqqiisoqarsinnaasoq, tassalu Paamiuni peqqissaavik Nuummi nakorsiartarfimmit sullinneqarpoq, nakorsiartarfimmi nakorsat paarlakaajaallutik Paamiuni sulisarlutik.
- Assersuutaannaavoq kisianni tassa Illoqqortoormiuni nakorsaqartariaqarpoq passusisinaasumik, Kommuneqarfik Sermersuumi borgmeteri Asii Chemnitz oqarpoq.
