Sermersooq Business Council nutaamik pisortassarsiussasoq
Ulla Lynge inuussutissarsiornermut siunnersuisooqatigiinni ukiuni sisamani pisortaareerluni suliunnaassaaq.
Ulla Lynge (talerperleq) Sermersooq Business Council ukiuni sisamani pisortaaffigereerlugu atorfimminit soraarpoq
Allattoq Sara K. Jakobsen
septembarip 13-at 2017 08:56
Siulersuisuni siulittaasoq Martin Sandy Shalmi naapertorlugu Ulla Lynge pitsaasumik ineriartortitseqataasimavoq.
- Suliniut Colourful Nuuk, aallarnisaasunut siunnersuisarneq minnerunngitsumillu inuussutissarsiutinik ineriartortitsinermik suliniutit Ullap pisortaanerata nalaani ineriartortinneqarsimapput, siulittaasoq oqarpoq.
Sermersooq Business Council nutaamik januaarip aallaqqaataani atorfinittussamik pisortassarsiussaaq.
Sermersooq Business Council tassaavoq Kommuneqarfik Sermersuumi Inuussutissarsiornermut Siunnersuisooqatigiit kommunemi inuussutissarsiornikkut aningaasarsiornikkullu ineriartortitsinermik inuussutissarsiuteqartullu tapersersorlugit ineriartortitsinermik suliaqartoq.
