Seqineq siusinaanngilaq
Seqernup qaammatip aappaa-qeqqani tarrisimareerluni Qeqertarsuup Tunuanut nueqqaarnera ulloq manna januaarip 13-anni seqinniarnermik nalliussineqartarpoq. Ukiunili kingullerni maluginiarneqartalersimavoq seqinniarfik ullunik arlalinnik sioqqullugu seqineq nuereertartoq. Tamanna nassuiaatissarsiorparput.
Iterluarnaamili ullaaq tusarnaartut oqaluttuunneqarput seqineq ippassarli takuneqarsimasoq. Taama oqaluttuartuuvoq Isak Reimer. Ulloriarsiooq Michael Linden Vernle Tycho Brahe Planetariamut Københavnimiittumut sianerfigaarput seqernup taama siusinaarluni nuinera sumik nassuiaatissaqarnersoq paasiniarlugu, taannalu oqaluttuarpoq killingusaaq qummut qaangerlugu seqineq suli nuinngikkaluarluni nuisasutut isikkoqarsinnaasartoq, akerlianillu killingusaaq qaangerlugu nuereeraluarluni ilaanni takuneqarsinnaaneq ajortoq.
Tamatumunnga nassuiaatissaavoq nunarsuup silaannaa prismitut pissuseqartarmat. Prisme tassaavoq igalaamineq pingasunik teqeqqulik, taannalu isip saanut pisikkaanni qaamaneq peqinneqartarporlusooq, isigisarlu allanngortillugu.
Iluliarmiut takusaat tamatuminnga nassuiarneqarsinnaavoq, tassalu silaannarmi pissutsit, soorlu nillissuseq allalluunniit pissutaallutik silaannaq prismetut pissuseqalersinnaammat, nuisagaluit takuneqarsinnaajunnaarsillugit, tarrisimasullu nuisasutut isikkoqalersillugit, Michael Vernle nassuiaavoq.
