Seqerngup kaviinnalernerani atoqatigiikkusussuseeruttoqartarpoq
Seqerngup qaamajuarnerata hormoninik pilersuinerput akornusersinnaavaa taamaalilluni itisuumik sininneq pisariaqartitarput ajoquserneqartarluni, nunat immallu issittut avannarliit pillugit ilisimatooq, norgemiut tv-qarfianut NRK-mut taama oqaluttuarpoq.
-Qaratsap eqqarsarluarsinnaanera, ajunngitsunik aaliagiisinnaaneq, eqqaamannissinnaaneq, nutaanik pilersitsisinnaanermut ineriartortitsinerit aammalu timikkut inuulluataarneq itisuumik sinereernermi ajornannginnerulersarput, Issittumi uumasunik taamatullu nunat immallu issittumiittut pillugit ilisimatooq, Norgep issittoq pillugu ilimatusarfimmi, UiT-mi ilisimatooq, Gabriela Wagner, oqarpoq.
Ikkattumik sinittarnerup arnat angutillu assigiimmik sunnertarpai. Sinippiarsimanngikkaagattami atoqatigiikkusussuseeruttarpugut.
Taassumalu saniatigut sinnakissimatilluta nererusunnerulertarpugut, tassami inuup sananeqaataani stoffit marluk timi qaalernersoq kaannersorluunnit oqaluttuuttutullusooq ittaramiuk, tamannalu sinnakinnermi sunnerneqartarpoq. Timitta naliginnaasumik hormoninik melatoninik pilersuinera qaamanermik akornuserneqartarpoq, tamannalu ajornartorsiutaavoq. Melatoninimmi timi oqaluttuuttarmagulusooq tassa siniffissanngortoq.
Aaqqiissutissarlu uaneerarsuarmiittoq ilisimatooq oqarpoq, tassalu sininnermut tunngatillugu malitassaqarluartariaqartugut taassuma oqaatigaalu imatut:
Unnuit qaamaneri sinnariffigisalikkit
- Makiaariarlutit silap qaamanera atorluaruk.
- Sungiusimasatit attalluakkit unnukkullu piffissaq innartarfiiit aaliangersimasuutillugu.
- Sinittarfik saagujullugu taarsisilluaruk. Qulliit qaminneri naammanngilaq, mobiltelefonit qaamanerusinnaasullu allat innannginnerni akunneq ataaseq sioqqullugu qaminneqassapput
