Namminiilivinnissaq Siumumit ullulerusunneqartoq
Siumup Sisimiuni ataatsimeersuarnera ullaaq manna nalunaaqutaq qulingiluat qeqqa aallartippoq. Ataatsimiinneq aallarnerlugu Nuugaatsiami Illorsuarnilu ajunaarnersuaqarnerani eqqugaasimasut pillugit minutsimik ataatsimik nipaallisimasoqarpoq.
Siumup aallartitai partiip immikkoortortaqarfinneersut amerlanerit ippassaq Sisimiunut tikerarput, nuannaarput takummaallutillu.
Aaqqiagiinngitsut
Ullumi Siumut siulittaasuata Kim Kielsenip siulittaasup nalunaarutaa saqqummiutissavaa, kingornalu Siumup inuusuttai aamma nalunaarummik saqqummiussissallutik.
Aqagu Siumup siulittaasussaanik taasisinnaasut ullumi kisinneqassapput, pissanganassaarlu aallartitat taasisinnaasut tamarmik Sisimiunut tikissimanersut paasissallugit, tassami taaseqataaniaraanni najuunnissaq piumasaqaataavoq.
Siulittaasunngorniuuttussat aaqatigiinnginnerat takuneqarsinnaavoq. Ippassaq Sisimiut tungaanut aallalerluta timmisartumi Vittus Qujaukitsoq Kim Kielsenilu takuakka. Nangaasunnguamik assamminnertaqanngitsumik ilassipput. Sanileriillutik issianeranni oqaloqatigiinngillat imminnullu qiviassanatik, taamaattoqarneratalu siulittaasunngorniuunnissaat piisanganarsitiinnarpaa.
Suleqatigiissitat aallartitanik inuttalersorneqarsimasut ullumi eqqartueqatigiissapput tassanilu Siumut ukiuni aggersuni sumik sulissuteqassanera kiisalu Inatsisartunut aappaagu qinersinissaq oqaloqatigiissutigissavaat.
Namminiilivinnissap ullulerneqarnissaa piumaneqartoq
Suleqatigiissitat namminiilivinnissaq oqallisiginiaraat maannangaaq takuneqarsinnaalereerpoq. Aallartitat arlallit nunatta namminiilivinnissaanut partii ulluliisikkusuppaat.
Kim Kielsenip nunatta Danmarkimiit avissaarnissaa ullulerusunnagu KNR-imut oqaatiginikuuaa. Taassumali kinguaariit tulliisa ulluliisinnaalernissaat aqqutissiuunniarpaa, namminiilivinnissallu piviusunngortinnissaanut nunatsinni soorlu isumaginninnikkut ajornartorsiutinut nunaqartullu ilinniagaqarsimasut ikippallaarneranik aaqqiissuteqaqqaartariaqarsoraluta.
Vittus Qujaukitsulli nunarput sukkanerpaamik namminiilivitsikkusuppaa.