Saviminissarsiorfissatut pilersaarut nalorninartorsiorfiusoq

Aatsitassarsiortitseqatigiiffiup Nuup Kangerluani saviminissarsiorfimmik aallartitsinissani Namminersorlutik Oqartussanut siorna isumaqatigiissutigaa. Aatsitassarsiortitseqatigiiffiulli Afrikami Sierra Leonemi aatsitassarsiornermini annaasaqarujussuarnerata kinguneranik, suliffeqarfiup aningaasaataarunnini nalunaarutigaa.

Tamatuma kinguneranik ataatsitassarsiortitseqatigiiffiup pappiaqqat piginneqataassutai, Londonimi aningaasanik niuerfimmi nalikillerujussuarput.

- Pisoq suliffeqarfimmut tamakkiisumik sunniuteqarpoq, Kalaallit Nunaannili pilersaarummut qanoq sunniuteqassanersoq nalugallarparput, London Miningimit taama oqarput.

Suliffinnik ataavartunik 750-inik pilersitsisinnaasoq

London Miningimit oqaatigineqartut naapertorlugit, Isukasiani pilersaarut aallartinissarneqarnermi nalaani sullivinnik 3.000-it missaanniittunik pilersitsiviussaaq, aatsitassarsiorfillu atuutilerpat aalajangersimasunik 750-inik sulisoqassalluni. Tamatuma saniatigut aamma oqaatigineqarluni, saviminissarsiorfik piviusunngussappat tamanna ukiut 15-it ingerlanerini Nunatta karsianut 30 milliardit koruunit sinnerlugit iluanaarutaasinnaasoq.

London Mining maanna aningaasassarsiuleruttorpoq, piginneqataassutilli maannamut nalikilliartuinnavissut, Jyllands-Postenimi allaaserineqarpoq.