Savalimmiut Tyrkialu killilersugaanngitsumik niueqatigiinnissamik isumaqatigiissuteqartut

TYRKIA: Savalimmiormiut lagmandiata Kaj Leo Holm Johannesenip tyrkiamiullu aningaasaqarnermut ministeriata nunat taaku marluk akornanni killilersugaanngitsumik niueqatigiinnissamik isumaqatigiissut ullumi atsiorpaat. Tamanna Tyrkiap illoqarfiisa pingaarnersaanni Ankarami ataatsimeeqatigiinnermi pivoq.

Taamatut isumaqatigiissuteqarnissaq ukiuni 15-iuni piareersarneqarsimavoq, Savalimmiormiullu tyrkiamiunut 80 millionit missaaniittunut, pingaartumik kapisilinnik atuigaluttuinnartunut, aalisakkanik amerlanerusunik nioqquteqarnissaannut aqqutissiuussissaaq. 

Savalimmiut 2012-imi avammut nioqqutigisaat tamarmiusut 5,5 milliardit koruuninik naleqarput, taakkunanngalu 591.200 koruuniinnaat nalinginut Tyrkiamut nioqquteqartoqarpoq. Savalimmiuni ukioq taanna tunisat pisiallu oqimaaqatigiinnerat 1 milliardit koruunit sinnerlugit amigartooruteqarfiuvoq, siornali tamanna -186 millionit koruuninut appartinneqarsinnaasimalluni.

Ullumikkut isumaqatigiissutaasoq taamaasilluni Savalimmiut avammut nioqquteqarnerannut alloriarneruvoq pingaarutilik, avammummi nioqqutigineqartartut 98 procentii tassaammata aalisakkat.

- Pingaaruteqartupilussuuvoq. Kalaallit Nunaat assingalugu avammut nioqquteqarnerput pisariaqartittupilussuuarput, Tyrkiamilu atuisartut 80 millionit missaanniimmata killilersugaanngitsumik niueqatigiinnissamik isumaqatigiissuteqarnerput periarfissatsialaavoq, lagmand Kaj Leo Holm KNR-imut oqarpoq.

Killilersugaanngitsumik niueqatigiinnissamik isumaqatigiissutinik allanik kissaateqartut

Savalimmiormiut tyrkiamiullu isumaqatigiissuteqarnerisigut nunat taakku akornanni akitsuutit 20 aamma 40 procentit akornanniittut atorunnaarput. Savalimmiullu assingusunik isumaqatigiissuteqarnissatik siunissami qaninnerpaami kissaatigaat. 

Ruslandip Kinallu killilersugaanngitsumik niueqatigiinnissamik isumaqatigiissuteqarfiginissaat Savalimmiunit maanna sulissutigineqarpoq. Savalimmiut Kalaallit Nunaat assingalugu EU-mut ilaasortaanngilaq, taamatullu inissisimatilluni nunanik allanik niuernikkut aalajangersimasumik suleqateqarnissaq pingaaruteqartoq, Kaj Leo Holm Johannesen isumaqarpoq.

- Nunanut allanut tunngasunut nukippassuit atorpagut. EU-mut ilaasortaanani pitsaasunik isumaqatigiissuteqarnissaq pingaaruteqartupilussuuvoq, nioqqutigisattami assinginik nioqquteqartut nunarsuaq tamakkerlugu unammillerpaatigut. Nunarsuarmi niuerfinni killilersugaanani, akitsuutit imaluunniit niuernikkut aporfiusinnaasut apeqqutaatinnagit, nioqquteqarsinnaaneq pingaaruteqarpoq, lagmandi taama oqarpoq.