Savalimmiut Nunatsinni sinniisuutitaqalernissartik kissaatigigaat

Savalimmiormiut Nunat Avannarliit Siunnersuisoqatigiiffianni Danmark aqqutiginagu namminerli ilaasortanngornissartik Nunat Avannarliit Siunnersuisoqatigiiffiannut taamaammat kissaatigisimavaat. Savalimmiormiut nutaarsiassaqartitsiviat taama ilaatigut allaaserisaqarpoq.

- Nunat Avannarliit allat assinganik periarfissaqarusuppugut, assigiimmik pisussaaffeqarusulluta, aningaasaqarnermut tunngasut, tassungalu atatillugu akisussaaffiit taakkununnga ilaapput, Savalimmiormiut nunanut allanut tunngasunut naalakkersuisuat Poul Michelsen taama oqarpoq.

Savalimmiut nunat tamalaat niueqatigiinnikkut suleqatigiiffiannut WTOmut, nunallu Europamiittut niueqatigiinnikkut suleqatigiiffiannut EFTA-mut namminerisamik ilaasortanngorsinnaanissartik aamma kissaatigaat.

Savalimmiut USA-mi Nunatsinnilu sinniisuutitaqalernissartik aamma pilersaarutigigaat Poul Michelsenip oqaatigaa.

Savalimmiut tunngaviusumik inatsiseqalernissaannut innuttaasut aappaagu 2017-imi taasitinneqarnissaat Savalimmiuni naalakkersuisut siusinnerusukkut nalunaarutiginikuuaat.