Savalimmiut nunarput suleqatiginerorusukkaat
- Soorunami Savalimmiuni naalakkersuisut siulittaasuattut Kalaallit Nunaanni partiit inuiaallu kalaallit uummammit pisumik inuulluaqqorusuppakka, siunissamilu naammassiniagassatigut pitsaanermik angusaqarnissaannik kissaallugit, Savalimmiuni naalakkersuisut siulittaasuat, Kaj Leo Holm Johannesen, nunatsinni qinersinerup aqaguani taama oqarpoq.
Qineqqusaarnermi sammineqartut ilisarnartillugit malittarisimavaat - tassalu nunap aningaasaqarnera pisuussutaalu.
Savalimmiummi Kalaallit Nunaannut naleqqiullutik mikisuarannguugaluartut nunat taakku marluk tunngaviusumik ataatsimik assigiissuteqarput:
- Isumaqavippunga immitsinnut ilinniarfigilluarsinnaasugut pinngortitami pisuussutitsinnut pittorsimasuugatta. Pinngortitami pisuussutitsinnik atuinerput aammalu pinngortami pisuussutit nunarsuarmilu akigitinneqartut qanoq inissisimanerat aningaasaqarnitsinnut aalajangiisuulluinnartuupput.
Tamannalu Kalaallit Nunaata Savalimmiullu oqaloqatigiissutiginerusariaqarpaat. Aammalu pissutsit ajornartoorutigineqartut ikioqatigiissutigisarlugit.
Savalimmiut ukiuni kingullerni aningaasaqarniarnikkut ilungersunartorsiorsimapput. Nunarsuaq tamakkerlugu aningaasaqarnikkut ilungersunartorsiorneq Kalaallit Nunaannut sunniuteqarpallaarsimanngitsoq Savalimmiunik 2008-mi eqquivoq - tamannali anigorneqarsinnaasimalluni:
- Qujanartumik oqaatigineqarsinnaavoq qaangerluarsimagipput, aamma aningaasaqarnikkut procentit sisamat tallimallu akornanni siuariarpugut. Aamma suliffissaaleqineq 3,6-3,3 procentit missaannut annikillisissinnaasimavarput. Taamaammat maannakkorpiaq ingerlalluarpugut. Kalaallit Nunaannitulli aningaasaqarnitta kinguariarfiusarneri siuariarfiusarneralu nalaattarparput, taamaammat Savalimmiut Kalaallit Nunaatalu europamiut danskilluunniit aningaasaqarnerat isiginiarsinnaanngilaat, Savalimmiummi Kalaallit Nunaatalu aningaasaqarnikkut naammassiniagassaannut assersuunneqarsinnaanngilluinnarpoq.
Nunalli taakku marluk allatut iliorsinnaapput. Tassalu nunat akornanni killilersugaanngitsumik niueqatigiinnissamik isumaqatigiissusiortoqarsinnaavoq, soorlu Savalimmiut Island peqatigalugu "Hollywoodimik isumaqatigiissuteqarnermikkut" taamaaliorsimasut, Kaj Leo Holm Johannesen oqarpoq:
- Kalaallit Nunaata - soqutigissaguniuk - peqataanissaa kissaatigisimavarput, taamaaliornikkut nunat akunnitsinni killilersugaanngitsumik niueqatigiinniassagatta.
