TAKSØEP NALUNAARUSIAA Savalimmiut nunanut allanut tunngasumik namminneq nalunaarusiorusupput

Danmarkip nunani allani soqutigisaanut Savalimmiut immikkut oqaaseqaasiorniarlutik eqqarsaatigaat. Taksøep nalunaarusiaanut - tassa naalagaaffeqatigiit nunani allani ataatsimut soqutigisaat pillugit nalunaarusiamut Savalimmiut peqataajumasimanngillat.

Savalimmiut nunanut allanut tunngasunut naalakkersuisuat oqarpoq savalimmiormiut nunani allani soqutigisaat danskit soqutigisaanniit allaanerulluinnarmata taamaaliorsimallutik.
Taksøep nalunaarusiaata ilusilersorneranut Kalaallit Nunaat peqataasimasoq Savalimmiut erseqqissumik peqataajumanatik nalunaarsimapput.

Sooq taamaaliorsimanersut Peter Taksøe Jensenip nalunaarusiamut akisussaasup akisinnaanngilaa. Nalunaarusiaq ataasinngormat tamanut saqqummiunneqarpoq.

- Savalimmiuni oqartussaasut aperisariaqarpatit. Qaaqqunikuuagut. Allaat aperinikuugaluarpagut: ilumoorlusi peqataajumanngilasi? Erseqqissumillu akipput peqataajumanatik.

Aamma atuaruk Politikki ataatsimoorussaq pillugu oqaloqatigiinneq ammasoq

Aamma atuaruk Ilisimatooq: Nalunaarusiaq Kalaallit Nunaannut periarfissiilluarpoq

Pisortatigut nassuiaataasimavoq Savalimmiuni septembarimi qinersinermut qanippallaartoq. Politikerit naalakkersuisunngortitsiniarlutik isumaqatigiinnialeruttorsimammata nalunaarusiassaq piffissaqarfigineqarsimanngilaq.

Nassuiaatissarli tassa Naalagaaffeqatigiit Issittumi soqutigisaat pillugit oqalliseqataanissaq siunertaqarsorinnginnamikku - nunanulli allanut tunngasut soqutigalugit.

Aamma atuaruk Inuit Ataqatigiit Taksøep nalunaarusiaa nuannaarutigaat

Savalimmiut nunanut allanut tunngasunut ministeriat Poul Michelsen KNR-imut ima oqarpoq.

- Issittumuinnaq sammimmat annikippallaarsorisimavara Danmarkilli nunanut allanut tunngasutigut politikkianut tamarmut akoorusukkatta uuma avataaniikkusuinnarsimavugut.

Nalunaarusiaq naammassisaq takoreerlugu Poul Michelsenip nuannaarutigaa suleqataaffigisimannginnamikku.

Kalaallit Nunaat peqataasimagaluartoq kalaallit nunani allani soqutigisaat nalunaarusiami nassuiarneqarsimanngillat.

- Isumaga malillugu akornusersuisuullunilu ajuallannartuuvoq.

Taarsiullugu Savalimmiut maanna namminneq soqutigisatik pillugit Danmarkimut allagaqarniarlutik eqqarsaatigaat.

- Soorunami Savalimmiut nunani allani soqutigisaat pillugit nammineq assigusumik nalunaarusiorsinnaavugut. Eqqoriarsinnaavaralu Kalaallit Nunaat Danmarkip nunanut allanut politikkia pillugu aamma taama oqassasoq danskillu naalakkersuisuinut nassiullugu. Peqataatinneqariarluni saqqummiussat eqqaaneqannginneriniit tamanna tulluarnerusoq, Savalimmiut nunanut allanut tunngasunut ministeriat oqarpoq.

Savalimmiut Danmarki aamma nalunaarfigisimavaat Savalimmiut naaminersornerunerat pillugu inatsimmi nunanut allanut tunngasortaa pillugu isumaqatigiinniaqqikkusullutik.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat

...allarpassuillu!