SAVALIMMIUNI QINERSINEQ Savalimmiuni naalakkersuisut ajorsarujussuartut
Partiit naalakkersuisuutitaqartut Sambandspartiet aamma Folkeflokken ilaasortaatiaminnik marlunnik annaasaqarput maannalu lagmandiusoq Kaj Leo Johannesen tunuartussanngussalluni. Nutaarsiassaqartitsiviit arlallit taama ilisimatitsipput.
Tamatuma akerlianik illuatungiliuttuni partiit annersaat Socialdemokratit arfinilinnik ilaasortaatitaqaraluartut marlunnik amerleriarlutik arfineq pingasunik ilaasortaatitaqalissapput taamalu Savalimmiuni partiini annersaalerluni.
Læs også Savalimmiuni aalisarnermit isertitaasut isumaqatigiinngissutaapput
Socialdemokratit siulittaasuat Aksel V. Johannesen 2.405-init qinerneqarpoq, maannalu lagmandiusoq taamaallaat 603-nit qinerneqarluni.
Ingammik akileraartarnikkut aaqqissuusseqqinnermi innuttaasunik akissarsiaqarnerpaanik pitsaanerulersitsineq aamma sullorsualiornermi paasissutissanik isertuussisimaneq maanna lagmandiusumut iluaqutaavallaanngillat.
Tamatuma akerlianik Socialdemokratit, ilaatigut akileraartarnermik aaqqissuusseqqinniarput, taamaalilluni innuttaasut agguaaqatigiinnerusumik aaqqiivigineqassammata.
Socialdemokratit partiit illuatungiliuttuusimasut allat peqatigalugit Savalimmiuni naalakkersuisunngortitsinissaq isumaqatigiinniutigalugu aallartittussaassapput.
