Folketingimut qinersineq 2015 Savalimmiormiut aalajangiisooratarsinnaasut
Tamannalu pisinnaavoq Savalimmiormiut qinersisinnaatitaasut 35.000-iusut Danmarkimi Folketingimut qinersinissaq soqutigivallaanngikkaluaraat.
Lagtingimut kingullermik qinersisoqarmat qinersisartut 87 procentii qinersipput, Folketingimullu qinersinermi 58 procentiinnaat qinersinissaat ilimagineqarluni.
Savalimmiormiut socialdemokratimik liberalimillu Christiansborgimut nalinginnaasumik aallartitaqartarput.
Tamannali ukiormanna allanngorsinnaavoq, partiimi talerperliusoq Sambandpartiet, ullumikkut Folketingimi ilaasortaatitaqartoq, Savalimmiuni tapersersorneqarpallaarunnaarsimavoq. Sambandspartiilu qinersisartunit pillarneqassagaluarpat partii Republikanerit isertitseratarsinnaassapput.
Republikanerit Savalimmiuni tv-kkut aallakaatissiami ippassaq unnukkut oqaatigaat Lars Løkke Rasmussen imaluunniit Helle Thorning-Schmidt Danmarkimi ministeriuninngussanersut soqutiginagu.
- Savalimmiunut nammineernerunissamik tunniussaqarsinnaasoq tikkuarusuppaat, Kaj Joensen, Savalimmiuni nutaarsiassaqartitsivimmi tusagassiortoq Danmarkip Radioanut taama oqarpoq.
- Republikanerit taamatut nalunaaruteqarnerat amerlanerusut qinersiartornerannik kinguneqassanersoq pissanganarpoq. Nammineernerunissamik oqariartuutigisaat partiinut qinigassanngortitaqartunut allanut ilungersortitsisinnaavoq. Taakkumi Folketingimi issiatitaqarnertik sumut atussanerlugu nassuiaatigisussanngorpaat, Kaj Joensen taama oqarpoq.
